ساۋد ارابياسىنىڭ ەنەرگەتيكا ءمينيسترى مۇناي باعاسىنىڭ قىمباتتايتىنىن ءمالىم ەتتى

استانا. قازاقپارات - ساۋد ارابياسىنىڭ ەنەرگەتيكا ءمينيسترى ءالي ءال- نايميدىڭ دۇيسەنبى كۇنگى مالىمدەمەسىندە مۇناي باعاسىنىڭ كوتەرىلەتىنى، الەمدىك ەكونوميكانىڭ ءوسۋى «قارا التىنعا» دەگەن سۇرانىستىڭ ارتۋىنا سەبەپشى بولىپ وتىرعانى ايتىلدى.

تاڭەرتەڭگى جاعداي بويىنشا اقپان ايىنداعى فيۋچەرستەردە Brent ەتالوندىق ماركالى مۇناي باعاسى 1,14 پايىزعا ءوسىپ، ءبىر باررەلى ءۇشىن 62,52 دوللارعا جەتتى. ال WTI ماركالى جەڭىل مۇنايدىڭ قاڭتارداعى فيۋچەرستەردە باعاسى 0,90 پايىزعا، باررەلى 58,03 دوللارعا دەيىن ءوستى، دەپ حابارلادى روس بالت.

 ءابۋ- دابيدە وتكەن جەكسەنبى كۇنى بولعان كونفەرەنسيادا ءالي ءال- نايمي مۇنايدىڭ شامادان تىس كوپ بولۋى «قارا التىننىڭ» وندىرۋشىلەرى اراسىندا و پ ە ك اۋماعىنان تىس ىنتىماقتاستىقتىڭ بولماۋىنا بايلانىستى ەكەنىن جەتكىزدى. سونىمەن بىرگە ونىڭ ايتۋىنشا، الەمدىك ەكونوميكالىق ءوسىم مۇنايعا دەگەن سۇرانىستى ارتتىرىپ وتىر.

شارادا ءسوز سويلەگەن كاتاردىڭ ەنەرگەتيكا ءمينيسترى مۇحاممەد ءال- سادا ارىپتەسىمەن كەلىسىپ، بۇگىنگى تاڭدا «قارا التىن» وندىرۋدە ونىڭ ارتىلۋى تاۋلىگىنە 2 ميلليون باررەل قۇرايتىنىن اتاپ ءوتتى. ول سونداي- اق مۇناي باعاسىنىڭ وزدىگىنەن تۇراقتاناتىنىنا سەنىم ءبىلدىردى.