ەلباسى ءوزىنىڭ سوڭعى ۋاقىتتا وقىعان كىتابى تۋرالى ايتتى
«ءبىزدىڭ بالا كەزىمىزدە اۋىلدىڭ مەكتەبىندە كىتاپ از بولاتىن. ول كەزدە كومپيۋتەر، ينتەرنەت دەگەن جوق، تەك قانا كىتاپ وقيتىن ەدىك. سول كەزدە ءسابيت مۇقانوۆتىڭ «بوتاگوزىن» ، بەيىمبەت مايليننىڭ كىتاپتارىن شەتىنەن وقيتىنبىز. قازىر كىتاپ تەڭىز. قايسىسىن تاڭداپ وقيتىنىڭدى دا بىلمەي قالاسىڭ. كەيدە كىتاپتى وقيتىن ۋاقىت تا جوق. دەگەنمەن، بۇدان كەتۋگە بولمايدى. وقۋ كەرەك. ال مەنىڭ قازىرگى وقيتىن كىتاپتارىما كەلسەك، ول نەگىزىنەن ەكونوميكالىق جاعداي جونىندە» ، - دەدى ن. نازاربايەۆ.
بۇدان بولەك، ەلباسى ءوزىنىڭ كەلەشەكتە نە بولاتىنىنا قىزىعاتىنىن دا ايتتى.
«سوعان بايلانىستى ەۋروپالىق بانكتىڭ پرەزيدەنتى بولعان، مەن تانيتىن جاك اتتاليدىڭ «بولاشاقتىڭ قىسقاشا تاريحى» دەگەن كىتابى بار، سونى وقىپ شىقتىم. وندا قازىرگى جاعداي زەرتتەلىپ، جاھاندىق زاماننىڭ عىلىم مەن ونەردىڭ وركەندەۋى ارقاسىندا ءومىردىڭ وزگەرەتىنى جازىلادى. مەن سوندايدى ءبىلىپ وتىرعىم كەلەدى، كوبىرەك وقيمىن. سوسىن بۇرىنعى پرەزيدەنتتەرگە ۇڭىلەمىن، سولاردى كوبىرەك وقيمىن. سەبەبى بۇنىڭ ىشىندە بىزگە كەرەكتىلەرى جەتەرلىك. سوسىن جاقىندا سماعۇل ەلۋبايەۆتىڭ كىتابىن وقىدىم، ونى بۇرىندارى دا قاراپ ءجۇرۋشى ەدىم. ءبىر كەزدەسۋىمدە ءابدىجامىل نۇرپەيىسوۆ وسى كىسىنىڭ كىتابى جاقسى دەپ سونى وقۋعا كەڭەس بەرگەن بولاتىن. سونى وقىدىم. سوسىن نۇرپەيىسوۆتىڭ ءوزىنىڭ «سوڭعى پارىز» دەگەن كىتابى دا بار. ونى دا وقىپ شىققانمىن. مەن سماعۇل ەلۋبايەۆتىڭ كىتابى سول ءا. نۇرپەيىسوۆتىڭ «قان مەن تەرىنە» ەلىكتەگەنى بولار دەپ ويلادىم. ەكەۋى دە جاقسى شىققان رومان» ، - دەدى ن. نازاربايەۆ.
«كىتاپ كوپ، ءبارىن وقىپ شىعۋ مۇمكىن دە ەمەس ءتارىزدى» ، - دەدى ەلباسى.
