ەلباسى: وڭاي جولمەن كەلەتىن اقشا، تەز- اق جۇمسالادى

   استانا. قازاقپارات - تاۋەلسىزدىكتى جاريالاۋ مەن ونى ساقتاپ تۇرۋ - ەكى ءتۇرلى ماسەلە. ال تاۋەلسىزدىكتىڭ تىرەگى - ەڭبەك. بۇگىن ەلىمىزدىڭ جەتەكشى تەلەارنالار جۋرناليستەرىنە بەرگەن سۇحباتىندا ق ر پرەزيدەنتى نۇرسۇلتان نازاربايەۆ وسىلاي ءمالىم ەتتى.

ەلباسىنىڭ پايىمىنشا، تاۋەلسىز مەملەكەت رەتىندە ساقتالۋ، ءوزىن سىيلاتۋ ءۇشىن ونىڭ ەكونوميكاسى قۋاتتى، قورعانىس قابىلەتى مىعىم، حالقى ءبىلىمدى ءارى سالاماتتى بولۋى شارت. ال بۇنىڭ ءبارى ەڭبەكپەن كەلەدى.

 «ادام ءوزىنىڭ ەڭبەگى ارقىلى وتباسىن عانا ەمەس، مەملەكەتتى دە نىعايتادى. زاۋىتتار مەن فابريكالار ەڭبەكپەن سالىنادى، عىلىم دا ەڭبەككە نەگىزدەلەدى، كىتاپتان باستاپ ءبارى دە ەڭبەكپەن دۇنيەگە ەنەدى. ەڭبەك ادامنىڭ ارمانىن ورىنداپ، قوعام دامۋىنا وڭ ىقپال ەتەدى. ەڭبەك تاۋەلسىزدىكتى تۋدىرادى. ەڭبەكپەن تابىلعان اقشا ادامعا تاۋەلسىزدىك بەرەدى. سوندىقتان دا مەن بارشا جاستارعا ەڭبەككە بارىنشا ءمان بەرۋدى ايتۋدان جالىقپايمىن» ، - دەدى ن. نازاربايەۆ.

 سونىمەن قاتار، ەلباسى جاستار اراسىندا تەز بايىپ كەتۋگە ەلىگەتىندەر كوپ ەكەنىن ايتتى. «وڭاي جولمەن كەلەتىن اقشا، تەز- اق جۇمسالادى. وسىنى ءتۇسىنۋ كەرەك. اقشا كەلەدى، كەتەدى، ال كاسىبي بىلىكتىلىك بولسا، ونى ەشكىم دە تارتىپ الا المايدى. سوسىن جۇمىسشى ادامعا باسا نازار اۋدارۋ كەرەك» ، - دەدى پرەزيدەنت.

 

اۆتور: قانات مامەتقازى ۇلى