قازاقپارات اگەنتىگىنىڭ شەف رەداكتورى ريزابەك نۇسىپبەك ۇلى «دارابوز ءداستۇر» جىر ءمۇشايراسىنىڭ جۇلدەگەرى اتاندى
قازاقستان رەسپۋبليكاسى ۇلتتىق سپورت تۇرلەرى قاۋىمداستىعى تاۋەلسىزدىك كۇنى قارساڭىندا 2014 - جىلعى ۇلتتىق سپورتتىڭ ۇزدىكتەرىن ماراپاتتاۋعا ارنالعان «التىن تۇعىر» شاراسى اياسىندا جاس اقىندار اراسىندا ۇلتتىق سپورتتى ناسيحاتتايتىن ءمۇشايرا ۇيىمداستىرعان بولاتىن.
«دارابوز ءداستۇر» اتتى وسى ءمۇشايراعا ەلۋدەن استام اقىندار ولەڭىن ۇسىندى. اقىندار ءمۇشايراعا ۇلتتىق سپورتتىڭ كەز كەلگەن ءتۇرىن سيپاتتاعان، ۇلتتىق ويىندار جايلى ولەڭدەرىمەن قاتار ەركىن تاقىرىپتا ءبىر ولەڭىن جىبەردى.
ءمۇشايراعا كەلىپ تۇسكەن ولەڭدەردى سايتىمىز جاريالاپ تۇردى. ەندى مىنە بايقاۋدىڭ قورىتىندىسى دا بەلگىلى بولدى.
باس جۇلدە - قۋانىش قولحاي (150000 تەڭگە)
ءبىرىنشى ورىن - نۇرجان ءبايتوسوۆ (100000 تەڭگە)
ەكىنشى ورىن - ادال ساعدات، ايدانا سەگىزبايەۆا (70000 تەڭگەدەن)
ءۇشىنشى ورىن - ەربول الشىنباي، ريزابەك نۇسىپبەك (50000 تەڭگەدەن)
ىنتالاندىرۋ - جاكەش عالىم، داستان وماروۆ (25000 تەڭگەدەن)
ءىلياس جانسۇگىروۆ اتىنداعى ارنايى جۇلدە - ۇلاعات حانزادا (30000 تەڭگە)
ساكەن سەيفۋللين اتىنداعى ارنايى جۇلدە - قايسار قاۋىمبەك (30000 تەڭگە)
ريزابەك نۇسىپبەك ۇلىنىڭ ولەڭى
كوكپار!
قانىندا قايناعان تەكتىلىك،
جانىندا تازالىق بەك تۇنىق.
كوزىندە ەرلىكتىڭ جارقىلى،
سوزىندە قانجارداي سەستىلىك.
بىلەكتە بىلەۋدەي تامىرى،
جۇرەكتە الاۋلاپ جالىنى.
كوكپارعا شابادى جىگىتتەر،
بۇلقىنىپ بۋراداي قارىمى.
تاقىمدا تۇلپارى شيرىعىپ،
تۇياقتا قارا جەر ميلىعىپ.
كولدەنەڭ تاستالعان كوكپاردى،
بۇركىتتەي بۇرەدى شۇيلىگىپ.
ەزدەردىڭ قۇم بولىپ جىگەرى،
قاراۋعا باتپايدى جۇرەگى.
سىرەسكەن بىلەكتىڭ قارىنا،
سەركەنى قاڭباقتاي ىلەدى.
ەرلىك تە، ورلىك تە وسىندا،
ورىن جوق جاسقانۋ جاسۋعا.
باتىر، ەر بابامنان ءبىر بەلگى،
جەتتى ايتەۋ وسىناۋ عاسىرعا.
ماقتان عىپ ايتارداي ۇرپاعى،
ەسىمدە جۇلدە العان كۇن تاعى.
استانا تورىندە اتوي ساپ،
قازاقتىڭ ەركىندىك تۇلپارى.
ەي، قازاق جەرىڭ گۇل، كوگىڭ نۇر،
وسسە ەكەن سەرگەك قىز، سەنىمدى ۇل.
الەمدى قاپتاعان ۋاقىت بۇل،
ناۋەتەك، ناشاقور، كوگىلدىر.
جىن- ويناق جيركەنتكەن كوكپارشى،
كەزەگىڭ كەلدى عوي سەنىڭ ءبىر.
قىلىمسىپ قىزتەكە بولعاننىڭ،
قامشىڭمەن وسىپ ءوت جونىن ءبىر.
ولاردىڭ ۇكىمىن شىعارىپ،
الەمگە كورسەتكەن ءمورىڭ بۇل!
ەۋروپا تارتقاندا ازابىن،
گەيلەردىڭ شەرۋى، مازاعىن.
ۇلدارىڭ اتپەنەن كىرگىزگەن،
بازارلى تويىڭنىڭ اجارىن.
سالىم ساپ وينايتىن كوكپاردا،
سالىمىڭ بار ەكەن قازاعىم.
كىسىنە ەركىندىك تۇلپارى،
ەرلىكتىڭ ولەڭىن جازامىن.
