رەسەي جاڭا سانكتسيالارعا «جاۋاپ» قايىرماق

استانا. قازاقپارات - رەسەي سىرتقى ىستەر ءمينيسترىنىڭ (س ءى م) ورىنباسارى الەكساندر لۋكاشيەۆيچ «ماسكەۋ ا ق ش پەن كانادا جاريالاعان جاڭا سانكتسيالارعا قارسى شارالار قابىلدايدى» دەپ مالىمدەدى.

ا ق ش پەن كانادا 18-19- جەلتوقسان كۇندەرى رەسەيدىڭ قىرىمدى اننەكسيالاۋىنا جانە ۋكراينانىڭ شىعىسىنداعى ارەكەتتەرىنە بايلانىستى جاڭا سانكتسيالار سالاتىنىن حابارلاعان.

رەسەي سءى م سايتىنداعى لۋكاشيەۆيچتىڭ مالىمدەمەسىندە «دونەتسك جانە لۋگانسك رەسپۋبليكالارىنىڭ باسشىلارىنا سالىنعان جاڭا سانكتسيالارعا بايلانىستى وكىنىشىمىزدى بىلدىرەمىز. مۇنىڭ ءوزى باتىستىڭ ۋكراينانىڭ شىعىسىنداعى داعدارىستى شەشۋگە تىرىسپاي وتىرعانىن كورسەتەدى» دەپ جازىلعان. ونىڭ ايتۋىنشا، بۇل سانكتسيالار ساياسي پروتسەستەرگە كەرى اسەر ەتەدى.

ا ق ش پرەزيدەنتى باراك وباما 18- جەلتوقسان كۇنى قىرىممەن ساۋدا قاتىناستارىن توقتاتاتىن زاڭ جوباسىنا قول قويىپ، ەلدىڭ قارجى مينيسترلىگىنە ۋكرايناداعى جاعدايدى ۋشىقتىرۋعا قاتىسى بار ادامدار مەن مەكەمەلەرگە جاڭا سانكتسيالار سالۋدى تاپسىرعان ەدى. سانكتسيا تىزىمىنە رەسەي مەن ۋكراينانىڭ 24 ازاماتى مەن بىرنەشە كومپانياسى ءىلىندى. «نوچنىە ۆولكي» بايكەرلەر كلۋبى مەن «نوۆوروسسيا» پارتياسى دا «قارا تىزىمگە» ەندى.

كانادا 19- جەلتوقسان كۇنى جاريالاعان جاڭا سانكتسيالار رەسەيگە مۇناي-گاز سالاسىنداعى تەحنولوگيالاردى ەكسپورتتاۋعا تىيىم سالادى. وسى اپتا ەۋروپا وداعى (ە و) دا قىرىمعا ينۆەستيتسيا اپارۋعا شەكتەۋ قويعان ەدى.

رەسەي قىرىمدى قوسىپ العالى جانە ۋكراينانىڭ شىعىسىنداعى قاقتىعىستار باستالعالى ا ق ش پەن ە و، كانادا مەن تاعى بىرنەشە مەملەكەت رەسەي شەنەۋنىكتەرى مەن كومپانيالارىنا، كاسىپكەرلەرىنە قارسى بىرنەشە دۇركىن سانكتسيالار جاريالاعان.

ماسكەۋ ۋكراينانىڭ شىعىسىندا رەسەي اسكەرى جوق دەپ مالىمدەۋمەن كەلەدى.

«ازاتتىق»