الماتى قالاسىنىڭ تۇرعىندارى ءجيى شالدىعاتىن اۋرۋلار

الماتى. قازاقپارات - الماتى قالاسىنىڭ تۇرعىندارى ءجيى شالدىعاتىن اۋرۋلاردىڭ ىشىندە اسقازان وبىرى ءتورتىنشى ورىندا كەلەدى. بۇل تۋرالى بۇگىن الماتى قالالىق ونكولوگيا ورتالىعىندا وڭەش پەن اسقازان وبىرىن الدىن الۋعا باعىشتالعان اشىق ەسىك كۇنى شاراسى بارىسىندا اتالمىش ورتالىقتىڭ دارىگەر-وتاشىسى عالىم ءجۇنىسوۆ مالىمدەدى.

ونىڭ ايتۋىنشا، رەسپۋبليكا بويىنشا ادامدار ءجيى شالدىعاتىن دەرتتەردىڭ ىشىندە اسقازان وبىرى ءۇشىنشى ورىنعا شىققان.

«بۇلار بيىلعى جىلدىڭ مالىمەتتەرى. سوندىقتان دا قازىرگى تاڭدا بۇكىل قازاقستان بويىنشا سوڭعى جىلدارى ونكولوگيالىق اۋرۋلارعا قاتىستى تەگىن سكرينينگتىك تەكسەرۋلەر ءوتىپ جاتىر. سولاردىڭ ءبىرى - بۇگىنى اشىق ەسىك كۇنى. ول وڭەش پەن اسقازان وبىرىن الدىن الۋعا باعىتتالعان. مۇندا تەكسەرۋلەر دە ەمدەۋ دە تەگىن جۇرگىزىلەدى. ەڭ الدىمەن، وڭەش پەن اسقازانداعى قابىنۋ ۇدەرىستەرىن انىقتاۋ ماقساتىندا حەليكوباكتەر پيلوري ىندەتىنە قاتىستى تەست الىنادى. ەگەر تەست وڭ ناتيجە بەرسە، وندا الداعى دۇيسەنبى كۇنى بوس اسقازانعا ەندوسكوپيالىق تەكسەرۋ جۇرگىزىلەدى. وندا بەينە ەندوسكوپ ارقىلى وڭەش پەن اسقازاننىڭ سىلەيمەلى قابىعى تەكسەرىلەدى. سونىڭ ناتيجەسىندە ناۋقاستى قانداي جولمەن ەمدەۋ كەرەكتىگى انىقتالادى» - دەدى ع. ءجۇنىسوۆ.

دارىگەردىڭ ايتۋىنشا، جالپى ادامدار اراسىندا قاتەرلى ىسىك جايىندا قاتە پىكىر قالىپتاسقان. ولار مۇنى ايىقپاس دەرت دەپ قابىلدايدى. بۇل دۇرىس ەمەس. قاتەرلى ىسىكتى ەمدەۋگە مۇمكىندىك بار. تەك بۇل ءۇشىن ادامدار دارىگەرگە ءجيى قارالىپ تۇرۋلارى قاجەت. ەگەر دە قاتەرلى ىسىك اسقىنعانىندا ەمەس، العاشقى كەزەڭىندە انىقتالاتىن بولسا، وندا ناۋقاس تولىق ەمدەلىپ شىعا الادى. دەگەنمەن، ايىعىپ كەتسە دە ولار ۇنەمى دارىگەردىڭ باقىلاۋىندا بولادى.

اۆتور: جاپپاربەرگەن ايبوتا