قىتايدى تامسانتقان ءسابينا قازاقستاندىق فيلمنىڭ باستى رولىندە وينايدى - كەسكىن
بۇل تۋرالى استانادا وتكەن «حالىقتىڭ سۇيىكتىسى» ۇلتتىق سىيلىعىنىڭ ماراپاتتاۋ راسىمىندە بەلگىلى بولدى.
ءسابينا التىنبەكوۆا «حالىقتىڭ سۇيىكتىسى» سىيلىعىنىڭ «جىل جاڭالىعى» اتالىمىندا لاۋرەات اتاندى.
«Like» فورماسىندا جاسالعان ەسكەرتكىشتى وعان اكتەر فارحات ءابدىرايىموۆ سىيلادى. بۇل جۇلدەنىڭ اۆتورى ءارى ۇيىمداستىرۋشىسى - قازاقستاندىق بەلگىلى قوعام قايراتكەرى، «رەسپۋبليكا- ءوڭىر- دامۋ» قورىنىڭ پرەزيدەنتى عالىم بايتوق.
«كىشكەنتاي قۇپيامدى اشايىن. ءبىز فارحات ابدرايىموۆپەن بىرگە جاڭا كوركەم فيلمنىڭ پروديۋسەرلىك جۇمىستارىمەن اينالىسىپ جاتىرمىز، ونىڭ جۇمىس اتاۋى - «پۋت دوموي»، باستى رولىندە ءسابينا التىنبەكوۆا وينايدى.
فارحات ءابدرايىموۆ تا باستى رولدەردىڭ ءبىرىن سومدايدى. فيلم 90- جىلدارى اسىراپ الىنعان بالانىڭ ءوز وتانىنا ورالۋى جايىندا. مۇڭدى وقيعا حەپپي- ەندپەن بىتەدى»، - دەدى ماراپاتتاۋ كەزىندە عالىم بايتوق.
«رومانتيكالىق وقيعا، كارتينانى 2015 - جىلى تۇسىرەمىز. مەن ءسابينانىڭ اكەسى بولىپ وينايمىن»، - دەدى فارحات ءابدىرايىموۆ.
ءسابينا التىنبەكوۆا - قىتايدا ءوزىنىڭ مۋلتفيلم كەيىپكەرىنە ۇقساس كەلبەتىمەن تانىمال بولعان قازاقستاندىق ۆولەيبولشى. ءسابينا 17 جاستا، ول ۆولەيبولدان قازاقستاننىڭ جاستار قۇراماسىندا وينايدى. ول ءوزىنىڭ بويىمەن (182 س م) جانە كەلبەتىمەن قىتاي جانكۇيەرلەرىنىڭ جۇرەگىن جاۋلادى.
سۇلۋ ۆولەيبولشى تۋرالى الەمنىڭ اقپارات قۇرالدارى جارىسا جازىپ جاتىر. بۇگىندە ونىڭ Instagram-داعى اككاۋنتىنا 300 مىڭنان استام وقىرمان تىركەلگەن. التىنبەكوۆاعا مودەل بيزنەسىنەن، برەندتەردەن ۇسىنىستار ءجيى ءتۇسىپ تۇرادى، ءبىراق ول اكتريسا نە مودەل بولۋدان باس تارتىپ، ءبىلىم الۋ مەن جاتتىعۋعا دەن قوياتىنىن ايتتى.
ول «EXPO-2017 ارۋى» بايقاۋىن جاريالاۋدى ۇسىندى، وعان كەز كەلگەن قىز بالا قاتىسا الادى، ال قازىلار القاسى ولاردىڭ اراسىنان فينالعا 25 ارۋدى ىرىكتەيدى. جەڭىمپازعا حالىقارالىق كورمە كەزىندە قازاقستاندى الەمگە تانىتۋ قۇقىعى بەرىلەدى.
