استانانىڭ ونەر سۇيەر قاۋىمى فاريزانىڭ جىر-الەمىمەن قايتا قاۋىشتى
بەلگىلى تەاتر ارتىستەرى اقىننىڭ ولەڭدەرىن ناقىشىنا كەلتىرىپ وقىدى. كومپوزيتورلار ەسكەندىر مەن ءبىرجان حاسانعاليەۆتەر، تانىمال انشىلەر نۇرلان ونەربايەۆ، ايگۇل قوسانوۆا، مەيرامبەك بەسبايەۆ، جۇبانىش جەكسەن ۇلى، سونداي-اق «مۇزارت» توبى مەن «اڭسار» تريوسى اقىننىڭ سوزىنە جازىلعان اندەردى شىرقادى.
وسى كەشتە كورەرمەندەر بەينەتاسپاعا جازىلىپ الىنعان فاريزا وڭعارسىنوۆانىڭ ءوزى وقىعان ولەڭى مەن اقىننىڭ باقىت تۋرالى ايتقان وي-تولعامدارىن تىڭداۋ مۇمكىندىگىنە يە بولدى.
ايتا كەتۋ كەرەك، ف. وڭعارسىنوۆا 1939 - جىلدىڭ 25 - جەلتوقسانىندا قازىرگى اتىراۋ وبلىسىنىڭ يساتاي اۋدانىنا قاراستى ماناش اۋىلىندا دۇنيەگە كەلگەن بولاتىن. 2014 - جىلى 23 - قاڭتاردا دۇنيەدەن وزدى.
حالقىمىزدىڭ ارداقتى اقىنى، قوعام قايراتكەرى فاريزا وڭعارسىنوۆانىڭ بۇكىل سانالى عۇمىرى ءوز حالقىنا قىزمەت ەتۋگە ارنالعان ەدى. ونىڭ ۇلتجاندىلىق، ادالدىق پەن تەكتىلىك، نازىكتىك پەن بەكزاتتىق سياقتى اسىل قاسيەتتەرى جالىندى دا جاۋھار جىرلارىنان كورىنىس تاپقانى انىق. سول ارقىلى ول بارشا قازاقتىڭ جۇرەگىنە جول تاپتى. فاريزا ولەڭدەرى حالقىمىزدىڭ ماڭگىلىك سارقىلماس رۋحاني قازىناسى رەتىندە قازاق پوەزياسىنىڭ التىن قورىنا ەندى.
اقىن جىرلارى قازاق حالقىمەن بىرگە ماڭگىلىككە جالعاسا بەرمەك. ەلىمىزدىڭ سۇيىكتى اقىنىنىڭ شىعارماشىلىعىنا ارنالعان كەش - سونىڭ ايقىن دالەلى.
اۆتور: ايدىن بايمەن
