تاۋەلسىزدىك تولعاۋى: جامبىل وبلىسىنىڭ اكىمى جاستاردى ۇلتتىق قۇندىلىقتاردى ساقتاۋعا شاقىردى

تاراز. قازاقپارات - جامبىل وبلىسىنىڭ اكىمى كارىم كوكىرەكبايەۆ كەشە جوعارى وقۋ ورىندارىنىڭ ستۋدەنتتەرىنە «زاماناۋي قوعامداعى جاستاردىڭ ءرولى مەن ولاردى قولداۋدىڭ باسىم باعىتتارى» تاقىرىبىندا ءدارىس وقىدى.

ايماق باسشىسى ەلباسى نۇرسۇلتان نازاربايەۆتىڭ «نۇرلى جول- بولاشاققا باستار جول» اتتى بيىلعى جولداۋىنىڭ ماڭىزدىلىعىنا توقتالدى، ءوڭىردىڭ الەۋمەتتىك- ەكونوميكالىق ناتيجەلەرى تۋرالى باياندادى.

ول ءوز سوزىندە وبلىس دامۋىنىڭ باستى الەۋەتى ادام كاپيتالى ەكەندىگىن، ونىڭ ىشىندە ستۋدەنت جاستار ۇلەسىنىڭ باسىمدىعىن ايتتى.

 - ەلباسى جولداۋىنداعى يدەيالارعا ءۇن قوسىپ، ونى جۇزەگە اسىرۋعا كۇش سالاتىن جىگەرلى جاستار، سىزدەرسىزدەر. مەملەكەت باسشىسى الدىمىزعا دامىعان 30 ەلدىڭ قاتارىنا كىرۋ تۋرالى ماقسات قويدى. وعان ۇلەس قوسۋ جاستاردىڭ ەنشىسىندە. بۇل - ۋاقىت تالابى - دەدى وبلىس اكىمى.

بۇدان وزگە، ءوڭىر باسشىسى بولاشاقتا تۋريستىك برەندكە اينالاتىن «ەجەلگى تاراز» ساياباعىنا ەرەكشە توقتالدى. ول كونە تاراز قالاشىعىنا جۇرگىزىلىپ جاتقان قازبا جۇمىستارى مەن 20 گەكتار جەرگە سوعىلاتىن، ينفراقۇرىلىمى جاساقتالعان «ەجەلگى تاراز» ساياباعىنىڭ ايماق ءۇشىن ماڭىزدىلىعىن اتاپ ءوتتى.

سونىمەن قاتار 2014-2017 - جىلدار ارالىعىندا وبلىسىمىزعا تارتىلاتىن ينۆەستيتسيا كولەمىنىڭ 47 ميلليارد تەڭگەنى قۇرايتىنىن، ونىڭ 33 ميلليارد تەڭگەسى جەكە ينۆەستيتسيا ەكەندىگىن ايتتى. ءقازىردىڭ وزىنە قۇنى 10 ميلليارد تەڭگەنى قۇرايتىن ساۋدا- ويىن- ساۋىق ورتالىعىنىڭ قۇرىلىسى باستالعانىن جەتكىزدى.

ستۋدەنتتەرمەن ەمەن-جارقىن اڭگىمە قۇرعان وبلىس اكىمى جاستاردىڭ سۇراقتارىنا جاۋاپ بەرىپ، ولاردى وتانسۇيگىشتىككە، ۇلتتىق قۇندىلىقتاردى ساقتاپ دارىپتەۋگە، ەل ءۇشىن ەڭبەك ەتۋگە شاقىردى، دەپ حابارلايدى ءوڭىر باسشىسىنىڭ باسپا ءسوز قىزمەتى.