تاۋەلسىزدىك تۋرالى پىكىر: كەرۋەن كوشى ىلگەرىلەپ كەلەدى - ش. جامالوۆ

استانا. قازاقپارات - وسى ءبىر تاريحي ولشەممەن العاندا قىسقا كەزەڭدە ەگەمەن ەلىمىز ەكونوميكالىق ەركىن دامۋدىڭ تىزگىنىن ۇستادى، ەرتەڭگى كۇنگە قارىشتى قادام جاسادى دەۋ ورىندى بولماق، دەيدى «ازەربايجاندار اسسوتسياتسياسى» رەسپۋبليكالىق قوعامدىق بىرلەستىگى اقتوبە قالالىق فيليالى كەڭەسىنىڭ ءتوراعاسى شاحباز جامالوۆ.

كۇنى كەشەگى كەڭەستەر وداعىنىڭ بودانىنان بوساعان بوستان ەلدى بۇگىن بۇكىل الەم مويىندادى. ەلباسى نۇرسۇلتان نازاربايەۆتىڭ سارا ساياساتى، كوشباسشىلىق كورەگەندىگى ارقاسىندا ىلگەرىلەۋگە ايقىن ءىز سالعان تاۋەلسىز قازاقستان الەمدىك قوعامداستىقتا ءوز ورنىن ويىپ تۇرىپ الدى دەسەك، ارتىق ايتقاندىق بولماس. ۋاقىت ىلگەرىلەگەن سايىن تاۋەلسىزدىكتىڭ نايجەلەرى مەن جەمىستى جولدارى ايقىن اڭعارىلۋدا. مەملەكەت باسشىسى ن. نازاربايەۆ كۇنى كەشە تاۋەلسىزدىك مەرەكەسىنە وراي سويلەگەن سوزىندە مۇنى ايقىن ايتىپ ءوتتى.

شىنىندا، ۋاقىت كوشى ىلگەرىلەگەن سايىن تاۋەلسىزدىكتىڭ قادىر- قاسيەتى دە ارتا تۇسەدى. ەلباسى ايتقان بەيبىتشىلىك پەن كەلىسىمنىڭ، ءوزارا سەنىمدە ءومىر ءسۇرۋدىڭ باعاسىن ءبىز بىلەمىز. ءار جىلدارى تاعدىردىڭ جازمىشىمەن قازاقستاندا تۇراقتاعان ۇلتتار مەن ۇلىستار دوستىق پەن بىرلىكتى ايقىن سەزىنىپ كەلەدى. مەنىڭ ءوزىم دە قازاق جەرىنە تامىر جايدىم. زايىبىم سۆەتا قازاق قىزى. بالا وسىردىك، نەمەرە سۇيدىك، وركەن جايدىق. سونىڭ بارىندە قازاق حالقىنىڭ كەڭقولتىق قوناقجايلىلىعىن، وزگە ۇلتتارمەن ءتىل تابىسقىش مەيماندوستىعىن كورىپ ءجۇرمىز. ءبىزدىڭ ەڭ باستى بايلىعىمىز دا وسى بىرلىگىمىز بەن بەيبىتشىلىگىمىز دەر ەدىم.

ەلىمىزدەگى بارلىق ۇلتتاردىڭ دوستىق پەن تاتۋلىقتا تۇرىپ جاتقانى الەمگە ايان.

بەيبىتشىلىك پەن تۇراقتىلىقتىڭ وسىنشالىقتى تامىر تارتۋى مەملەكەت قۇراۋشى حالىق - قازاقتاردىڭ مەيىرباندىعى مەن قوناقجايلىلىعىنا ۇيرەنگەن باسقا ۇلتتاردىڭ ءوزارا تاتۋلىعىنىڭ ناتيجەسى دەۋ ورىندى. قازاقستان دوستىق پەن ىنتىماقتىڭ جەرۇيىعى دەۋگە ابدەن لايىق. تاۋەلسىزدىك العان 23 -جىلدا ۇلتارالىق كەلىسپەۋشىلىكتىڭ ەشقانداي كورىنىسى دە اڭعارىلعان ەمەس. بۇل - ەلباسىنىڭ وسى باعىتتاعى سارا ساياساتى مەن ۇستانىمىنىڭ ارقاسى.

ستاتيستيكالىق دەرەكتەر بويىنشا، وبلىستا 1 مىڭنان استام ازەربايجان تۇرادى. شىنى كەرەك، ەلباسى نۇرسۇلتان نازاربايەۆتىڭ باستاماسىمەن دۇنيەگە كەلگەن قازاقستان حالقى اسسامبلەياسى ۇلتارالىق قاتىناستى دامىتۋدىڭ تاپتىرماس قۇرىلىمى، ءوزارا بىرلىك پەن تاتۋلىقتى قالىپتاستىرۋدىڭ بىرەگەي تەتىگى ەكەنىنە كوزىمىز جەتىپ وتىر. ىلگەرى جىلجىعان باقىت كەرۋەنىنىڭ كوشى كولىكتى، بىرلىگى مىقتى بولاتىنى كۇندەلىكتى ومىرىمىزدە ايقىن اڭعارىلۋدا.

 «ەگەمەن قازاقستان»