بالالاردى باسىنعان جۇرگىزۋشى جۇمىستان كەتتى

استانا. قازاقپارات - اتىراۋدا دەپۋتات اۆتوبۋس جۇرگىزۋشىسىنىڭ ۇستىنەن شاعىم ءتۇسىردى. كولىك جۇرگىزۋشىسى وقۋشىلارعا دورەكى سويلەپ، قول كوتەرىپ، قىلعىندىرعان.

بۇل تۋرالى "اق جايىق باسىلىمى" جازادى.

قالالىق ءماسليحات دەپۋتاتى جانداربەك ەرمۇحانوۆ مەكتەپ اۆتوبۋسى جۇرگىزۋشىسىنىڭ ۇستىنەن اۋەلى قالالىق ىشكى ىستەر باسقارماسىنا، ال كەيىن قالالىق پروكۋراتۋراعا شاعىمدانادى.

جۇمىسكەر اۋىلىنداعى №35 مەكتەپ- گيمنازياسىنىڭ وقۋشىلارىن نۇرسايا ىقشاماۋدانىنا تاسىمالداۋمەن اينالىسقان جۇرگىزۋشى ەرمۇحانوۆتىڭ 15 جاستاعى ۇلىنا قول كوتەرگەن.

وقيعا 17 - قاراشا كۇنى ورىن العان. سول كۇنى دەپۋتاتتىڭ ۇلى مەكتەپتەن كۇندەگى ۋاقىتىنان كەشىگىپ كەلدى. ءوڭى بوزارىپ كەتكەن. نە بولعانىن سۇراعاندا، اۆتوبۋس جۇرگىزۋشىسىنەن تاياق جەگەنىن ايتقان.

«سول كۇنى ۇلىم باستاۋىش جانە جوعارى سىنىپ وقۋشىلارىمەن بىرگە بەسىنشى ساباقتان شىعىپ، مەكتەپتىڭ اۆتوبۋسىن 20 مينۋتتاي كۇتكەن. كۇن سالقىن بولىپتى.  ۇلىمنىڭ ايتۋىنشا، اۆتوبۋس كەلگەن ۋاقىتتا سىرتتا توڭىپ قالعان بالالار اۆتوبۋسقا قاراي جۇگىرگەن. 44 جاستاعى اۆتوبۋستىڭ جۇرگىزۋشىسى مارات بەردىقۇلوۆ ەسىك اشپاي، كەيىن ءوزى سەكىرىپ ءتۇسىپ، بالالارعا ايقايلاپ، ۇرىسىپ، ولاردى «مالسىڭدار» دەپ بالاعاتتاعان»، - دەيدى جانداربەك ەرمۇحانوۆ.

ەرمۇحانوۆتىڭ ۇلى: «اعاي، ءسىز بىزگە بالاعات ءسوز ايتپاڭىز، ودان دا ۋاقىتىندا كەلسەڭىزشى» دەگەن سوزىنەن ول اشۋعا بۋلىعىپ، وقۋشىعا «سوپلياك قاتىنسىڭ» دەپ، وقۋشىلار مەن سىنىپ جەتەكشىسىنىڭ كوزىنشە بەتىنەن شاپالاقپەن ۇرىپ جىبەرگەن.

وسىدان كەيىن جۇرگىزۋشى بالانى اۆتوبۋسقا مىنگىزبەيتىنىن ايتىپ، سول جەردە جالعىز ءوزىن تاستاپ كەتكەن. دالادا ءبىر ساعاتتاي تۇرىپ قالعان وقۋشى بالا سول كۇنى تۇندە قاتتى قىزۋلاپ، اۋىرىپ قالىپتى.

«ءبىر اپتا مەكتەپكە بارعان جوق، كوڭىل كۇيى بۇزىلىپ، كۇيزەلىستە جۇرگەسىن ءبىز ونى پسيحولوگقا كورسەتۋگە ءماجبۇر بولدىق. وسىنداي جاعداي تۋرا ءبىر اي بۇرىن 17 - قازان كۇنى دە ورىن العان. ءدال وسى جۇرگىزۋشى ول كەزدە 7-سىنىپ وقۋشىسىن ۇرىپ، قىلعىندىرعان»، - دەيدى وقۋشىنىڭ اكەسى.

مەكتەپ اكىمشىلىگى ەشقانداي شارا قولدانباعان سوڭ، ءجابىر كورگەن بالانىڭ اناسى دا ەرمۇحانوۆپەن بىرگە 18 - قاراشا كۇنى قالالىق ىشكى ىستەر باسقارماسىنا ارىز بەرگەن.

الايدا، №35 مەكتەپ-گيمنازياسىنىڭ ديرەكتورى المابەك ابدولوۆ بۇل جايىندا ەشتەڭە بىلمەيمىن دەپ جاۋاپ بەردى. ول وسى جاعدايدان سوڭ وقۋشىلاردى تاسىمالدايتىن كومپانيا باسشىسىنا اۋىزشا ەسكەرتۋ عانا جاساعانىن ايتتى. كەيىن دورەكى جۇرگىزۋشىنىڭ جۇمىستان كەتكەنى انىقتالدى.

NUR. KZ