سيرياداعى سوعىس سەگىز قازاقتى جالمادى
بۇل تۋرالى بۇگىن باس پروكۋراتۋرادا ەكسترەميزم مەن لاڭكەستىككە قارسى ءىس- قيمىل ماسەلەلەرى بويىنشا وتكەن حالىقارالىق كونفەرەنتسيادا پرەزيدەنت جانىنداعى ستراتەگيالىق زەرتتەۋلەر ينستيتۋتىنىڭ ديرەكتورى، ساياسي عىلىمدار كانديداتى ەرلان قارين مالىمدەدى.
«بۇگىنگى كۇنى لاڭكەستەن ەڭ كوپ زارداپ شەككەن مەملەكەتتەردىڭ قاتارىندا يراك، پاكىستان، اۋعانستان، نيگەريا مەن سيريا ەلدەرى بولىپ وتىر. اتالعان مەملەكەتتەردىڭ قاتارىنا ءۇندىستان، سومالي، يەمەن، تايلاند جانە فيليپپين ەلدەرى قوسىلىپ كەلەدى. جاھانداعى تىنىشتىق ءۇشىن بۇل وتە قاۋىپتى قۇبىلىس. سوندىقتان بۇل جاعداي لاڭكەستىكپەن ءبارىمىزدىڭ بىرىگىپ كۇرەسۋىمىزدى قاجەت ەتەدى»، - دەدى قارين.
ساياسات تانۋشىنىڭ ايتۋىنشا، قازاقستان ءۇشىن سيرياداعى لاڭكەستىك جاعدايلار وتە قاۋىپتى بولىپ وتىر. اتالعان ەلگە لاڭكەستىك ءىس- قيمىلدارعا قاتىسۋعا اتتانعانداردىڭ ىشىندە قايتىس بولعاندارى دا بار.
«لاڭكەستەردىڭ وزدەرى ينتەرنەت ارقىلى تاراتقان دەرەكتەرگە سۇيەنسەك، بۇگىنگى كۇنى سيرياداعى سوعىستا 250 دەن استام قازاقستان ازاماتتارى بار. ال، ارنايى قىزمەتتىڭ مالىمەتتەرىندە 300 دەن جوعارى دەپ كورسەتىلەدى. ولاردىڭ 8 - ءى سول جاقتا قايتىس بولعان، 7 ەۋى ەلگە كەرى قايتقان. سوت ارقىلى جاۋاپكەرشىلىككە تارتىلعاندارى 3 ادام»، - دەدى ەرلان قارين.
كورشى قىرعىزستاننان بەيرەسمي دەرەكتەر بويىنشا 100 دەن استام ادام سيرياعا اتتانعان. ارنايى قىزمەتتەر بۇل ساندى 2 ەسە ەتىپ كورسەتەدى. ولاردىڭ اراسىندا 20 ادام قايتىس بولعانى انىقتالدى.
BAQ. KZ
