قوعامنىڭ نازارىن قازاق پوەزياسىنا اۋداردى

استانا. قازاقپارات - تاۋەلسىزدىك كۇنى قارساڭىندا بارلىق قازاقستاندىق تەلەارنالار «ادامعا دەگەن سەنىممەن» اتاۋىمەن الەۋمەتتىك روليكتەر سەرياسىن كورسەتە باستادى.

«نۇر وتان» پارتياسىنىڭ 15 جىلدىعىنا ارنالعان بۇل تەلەجوبا قوعامنىڭ نازارىن قازاق پوەزياسىنا اۋدارۋ ماقساتىندا قولعا الىندى.

 «ادامعا دەگەن سەنىممەن» بىرەگەي تەلەجوباسى ءۇش بەينەروليكتەن تۇرادى. ونىڭ ەرەكشەلىگى -  قازاق پوەزياسى كلاسسيكتەرىنىڭ تانىمال ولەڭدەرىن «ءبىزدىڭ زاماننىڭ قاھارماندارى» ارقىلى زاماناۋي قالىپتا ۇسىنۋ. بۇل شىعارماشىلىق يدەيا زامانداستارىمىزدىڭ، اسىرەسە، جاستاردىڭ قازاق پوەزياسىنىڭ ءىنجۋ- مارجاندارىنا قىزىعۋشىلىعىن ارتتىرۋعا مۇمكىندىك بەرمەك.

- ءبىز قازاق اقىندارىنىڭ جاۋھار سوزدەرىن ەكشەپ الدىق. بۇل - ءوزىنىڭ ومىرشەڭدىگىن دالەلدەگەن، تىڭداعاننىڭ جانىن تەبىرەنتەتىن سوزدەر. بۇل ولەڭدەر ءبىزدىڭ مىقتى حالىق، قۋاتتى مەملەكەت ەكەنىمىزدى سەزىنۋگە كومەكتەسەدى، - دەدى «نۇر وتان» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك.

ءبىرىنشى روليكتە اقىن ماعجان جۇمابايەۆتىڭ «مەن جاستارعا سەنەمىن» ولەڭى ۇسىنىلادى. تاريحتىڭ قيىن- قىستاۋ كەزەڭىندە قالىڭ جۇرتشىلىقتىڭ رۋحىن كوتەرگەن ولەڭ كۇنى بۇگىن جازىلعانداي، قازىرگى زاماندا دا ءوز ومىرشەڭدىگىن جوعالتپاعانىن كورسەتەدى.

 روليكتىڭ كەيىپكەرى -  دانيار ەلەۋسىنوۆ. ول -  بوكستان قازاقستاننىڭ قۇراما كومانداسىنىڭ جەتەكشىسى، اۋەسقوي بوكستان الەم چەمپيونى، AIBA نۇسقاسى بويىنشا «2014 - جىلدىڭ ەڭ ۇزدىك بوكسشىسى، «جاس تۇلپار» سىيلىعىنىڭ يەگەرى. روليكتە ول كۇندەلىكتى قيىندىقتاردى جەڭىپ شىعىپ، شار بولاتتاي شىڭدالعان، ءوز ۇستانىمىنان اينىماي ماقساتىنا جەتكەن ءوزىنىڭ بولمىسىن كورسەتەدى. زاۋىتتا جۇمىس ىستەيتىن، بوس ۋاقىتىندا جاتتىعۋمەن اينالىسىپ، جارىستارعا قاتىسىپ جۇرگەن كەيىپكەر بۇزاقىلاردىڭ سوققىسىنا ۇشىراپ، جاراقاتتانىپ قالعانىنا قاراماستان رينگكە قايتا ورالىپ، ۇلكەن سپورتتىڭ ماقتانىشىنا اينالادى.

- «پارتيانىڭ «ادامعا دەگەن سەنىممەن» اتتى تەلەجوباسىنا قاتىسۋ مەن ءۇشىن ۇلكەن مارتەبە. مەن ماعجان اتامىز جىرلاعانداي، «ارىستانداي ايباتتى» جاستاردىڭ مىنەز- قۇلقىن، ارەكەتىن كورسەتە الدىم دەپ ويلايمىن، - دەيدى دانيار ەلەۋسىنوۆ.

 ەكىنشى روليككە مۇقاعالي ماقاتايەۆتىڭ «اڭسا، جانىم» جىرى وزەك بولعان. روليكتىڭ كەيىپكەرى -  پەرزەنتتى بولا الماعاندىقتان بالا اسىراپ الۋ ءۇشىن بالالار ۇيىنە بارعان ەرلى- زايىپتى ادامدار. روليكتە الماتىداعى № 2 جەتىم بالالار ءۇيىنىڭ تۇلەكتەرى وينايدى.

- وسى روليكتەردىڭ ارقاسىندا جۇرتشىلىق قامقورلىقتى باعالاي الاتىن ءبىزدىڭ بالالاردى باسقا قىرىنان تانيتىنىنا سەنىمدىمىن. بۇگىنگى كۇنى ەكرانداردان مەيىرىمدىك تۋرالى ءسوز ءجيى ەستىلسە دەيمىن» دەدى ءتۇسىرۋ جۇمىستارى كەزىندە بالالار ءۇيىنىڭ ديرەكتورى اقمارال شاتايەۆا.

ءۇشىنشى روليكتە فاريزا وڭعارسىنوۆانىڭ «جاقسىلىق تۋرالى ءسوز» اتتى ولەڭى وقىلادى، باس كەيىپكەرى كوپبالالى جاس انا، ول كۇتپەگەن جەردەن بەيتانىس جاستاردىڭ كومەگىنە كەزىگەدى. بۇل روليكتى بيىل دۇنيە سالعان حالىق اقىنى جانە قوعام قايراتكەرىن ەسكە الۋ، قۇرمەتتەۋ شاراسى دەسە دە بولادى. اقىن شىعارمالارىندا ايەل بەينەسىن دارىپتەيدى، سول ايەلدىڭ يىعىنا تۇسكەن الەۋمەتتىك جانە ازاماتتىق جۇكتىڭ سالماعى كۇننەن- كۇنگە مولايىپ بارا جاتقانىن، ءبىراق قيىنشىلىقتارعا، جۇرەگىندەگى مۇڭى مەن قايعىسىنا مويىماي كەلە جاتقانىن كورسەتەدى.

 «ادامعا دەگەن سەنىممەن» تەلەجوباسى «نۇر وتان» پارتياسىنىڭ بۇدان بۇرىن جۇزەگە اسىرا باستاعان «باقىتتى وتباسى» مەن «باقىتتى بالالىق» جوبالارىمەن جانە «جاس وتاننىڭ» «جاستار -  وتانعا» جوباسىمەن ۇندەس.

 «ادامعا دەگەن سەنىممەن» الەۋمەتتىك روليكتەرىن «كەمەل مەديا» شىعارماشىلىق توبى دايىنداعان، بۇل توپ 2014 -جىلى قازاقستاننىڭ PR سالاسىنداعى «اق مەرگەن» جۇلدەسىنىڭ يەگەرى بولدى. سونىمەن قاتار كومپانيا قازاقتىڭ ۇلتتىق مادەنيەتى مەن تۇرمىستىق ەرەكشەلىكتەرىنىڭ سان قىرلىلىعى مەن بىرەگەيلىگىن كورسەتەتىن «قازاقستاندى تانىتۋ» («وتكرىۆايا كازاحستان» ) دەگەن جوبانى جانە ەلباسى ن. ءا. نازاربايەۆتىڭ قاتىسۋمەن وتكەن «پروستىمي سلوۆامي و گلاۆنوم» الەۋمەتتىك روليكتەرى سەرياسى سياقتى ءبىرقاتار جوبانى جۇزەگە اسىردى.

«ايقىن»