رۋبلدىڭ قۇلدىراۋى قازاق سپورتىنا قالاي اسەر ەتەدى؟

استانا. قازاقپارات - رەسەيدىڭ ورتالىق بانكىنە رۋبلدىڭ قۇنىن ءوز دەڭگەيدە ۇستاپ تۇرۋ قازىر اسا قيىندىق تۋعىزۋدا.

ەگەر، الداعى ءبىر-ەكى ايدا رۋبل تۇراقتالماسا ونىڭ اسەرى تەك رەسەيدىڭ ەكونوميكاسىنا عانا ەمەس، سونىمەن قاتار سپورتىنا دا اسەر ەتەتىن بولادى، دەپ جازادى «الاش ايناسى» ينتەرنەت- پورتالى.

شىنىندا، ءرۋبلدىڭ قۇنسىزدانۋى رەسەي سپورتىنىڭ قۇلدىراتىپ جىبەرۋى مۇمكىن. وعان سەبەپ تە كوپ. سونىڭ ءبىر- ەكەۋىن سانامالاپ تا بەرەيىك.

ماسەلەن، ورىستىڭ فۋتبولىن الايىق. رۋبلدىڭ قۇلدىراعانى بەلگىلى بولعاننان كەيىن، رەسەي بىرىنشىلىگىندە ونەر كورسەتەتىن كلۋبتاردىڭ بارلىعى دا قازىناسىنا كوز سالىپ، تيىن-تەبەندەرىن ەسەپتەۋگە كوشتى.

ويتكەنى، بۇگىنگە بۇل ەلدىڭ كلۋبتارىنىڭ اربىرىندە كەم دەگەن ءتورت لەگيونەردەن بار ەكەنى بەلگىلى. ال، ول فۋتبولشىلاردىڭ بارلىعى دا جالاقىلارىن رۋبلمەن ەمەس، دوللار نەمەسە ەۋرومەن الادى. ال، جەرگىلىكتى سپورتشىلاردىڭ بارلىعى دا كەلىسىمگە رۋبلمەن وتىرعان.

ەندى كلۋب جەتەكشىلەرى فۋتبولشىلارعا جالاقىنى قالاي بەرەمىز دەپ الەك بولىپ جاتىر. سەبەبى، شەتەلدىك فۋتبولشىلارعا جالاقى بەرەيىن دەسە ولاردىڭ ايلىعى دوللارمەن ەسەپتەلىنىپ، ەكى ەسە كوبەيىپ كەتسە، ءوز فۋتبولشىلارىنىڭ جالاقىلارى ءبىر نەمەسە ءبىر جارىم ەسەگە قىسقارىپ كەتەيىن دەپ تۇر.

تاعى ءبىر مىسال. فۋتبولدان رەسەي قۇراماسىنىڭ باس باپكەرى فابيو كاپەللو رۋبل قۇلدىراماي جاتىپ- اق جالاقىسىن دۇرىس الا الماي ءجۇر ەدى. نەگىزى، ول ايلىعىن ەۋرومەن الادى. ال، ونىڭ اۋەلگى جىلدىق ايلىعىن رۋبلمەن ەسەپتەسەك 450,6 ميلليون رۋبل بولاتىن. ەندى رۋبل قۇنسىزدانعاننان كەيىن باس باپكەردىڭ ايلىعى ەكى ەسە كوبەيىپ، 848,5 ميلليون رۋبل بولادى. سوندىقتان دا قازىرگى ۋاقىتتا دون فابيونىڭ جالاقىسىن قالاي بەرەمىز دەپ رەسەي فۋتبول وداعى باس قاتىرىپ وتىرعانى انىق.

بۇل تەك فۋتبولداعى جاعداي عانا. ءدال وسىنداي قيىن جاعداي رەسەيدىڭ حوككەيىندە دە، باسكەتبول، ۆولەيبول جانە وزگە دە سپورت تۇرلەرىندە بار. سەبەبى، ول سپورت تۇرلەرىنىڭ بارلىعىندا دا لەگيونەر سپورتشىلار جەتىپ ارتىلادى. ال، شەتەلدەن كەلگەن سپورتشىلاردىڭ بارلىعى دا كەلىسىمشارتتى رۋبلمەن ەمەس، دوللار نەمەسە ەۋرومەن جاسايتىنى بەسەنەدەن بەلگىلى دۇنيە.

مەيلى، بۇل رەسەيدىڭ شارۋاسى عوي دەپ كوزدى جۇمىپ قويۋعا دا بولار ەدى. ءبىراق، ءرۋبلدىڭ قۇلدىراۋى قازاق سپورتىنا دا ءوز اسەرىن تيگىزەدى. سەبەبى، رەسەيدە جۇمىسىنان ايىرىلعان سپورتشىلار ەندى قازاقستانعا لەك- لەگىمەن اعىلۋى مۇمكىن.

بۇل ءبىرىنشى كەزەكتە فۋتبولعا بايلانىستى. بارشاڭىزعا بەلگىلى، قازىردىڭ وزىندە قازاقستان بىرىنشىلىگىندە ونەر كورسەتەتىن كلۋبتار رەسەيدەن فۋتبولشى شاقىرتۋعا قۇمار. ول فۋتبولشىلاردىڭ دەڭگەيىن تەكسەرىپ جاتقان باپكەردى ءبىز بايقامادىق. ەندى رەسەي فۋتبولى قارجىلىق قيىندىقتارعا تاپ بولعاننان كەيىن بۇل ەلدە جۇمىسىنان ايىرىلعان اياقدوپشىلاردىڭ بارلىعى دا قازاقستانعا كەلەدى. ويتكەنى، بىزدە كەلىسىمشارتتار تەڭگەمەن نە رۋبلمەن ەمەس، دوللار يا بولماسا ەۋرومەن جاسالادى. مۇنداي اقشالارمەن جاسالاتىن كەلىسىمشارتتا سپورتشىنىڭ ۇتىلمايتىنى انىق.

رۋبلدىڭ قۇنسىزدانۋى حوككەيگە ۇلكەن اسەر ەتەدى. سەبەبى، قۇرلىقتىق حوككەي ليگاسى ءوز جۇمىسىن تولىق رۋبلمەن اتقارادى. دەگەنمەن، كەيبىر كلۋبتاعى شەتەلدىك حوككەيشىلەر دە كەلىسىمشارتى رۋبلمەن ەمەس، دوللارمەن جاساعان. ارينە، بۇل حوككەيشىلەر ايلىقتارىنان ۇتىلمايدى.

سپورتشىلارمەن كەلىسىمشارتى دوللارمەن جاساعان كلۋبتاردىڭ قاتارىندا ەلوردانىڭ «بارىس» حوككەي كلۋبى بار. بۇل كلۋبتىڭ ويىنشىلارى مۇنداي قيىن- قىستاۋ ۋاقىتتا ۇجىمدى تاستاپ كەتپەيدى. سەبەبى، ولار وزدەرىنە تيەسىلى جالاقىلارىن الىپ وتىر.

مۇنداي قيىن كەزەڭدە «اق بارس»، «دينامو»، «سكا» سەكىلدى كلۋبتار وزدەرىنىڭ بەلدى حوككەيشىلەرىنەن ايىرىلىپ قالۋى مۇمكىن. ءبىراق، كەشە سوچيدە قۇرلىقتىق حوككەي ليگاسى باسشىلارىنىڭ جيىنى ءوتىپ، وندا ليگانىڭ جاڭا باسشىسى دميتري چەرنىشەنكو ق ح ل- دا كلۋبتاردىڭ سانى دا، حوككەيشىلەردىڭ جالاقىسى دا قىسقارتىلمايدى دەگەن بولاتىن.

ارينە، باستاپقى كەزدە بۇل جاعدايدى باقىلاۋدا ۇستاۋعا بولاتىن شىعار. ال، ءبىراق، رۋبلدىڭ باعاسى ءبىر- ەكى ايدىڭ كولەمىندە تۇراقتالماسا وندا جوعارىدا ءبىز ايتقان كلۋبتار حوككەيشىلەرگە جالاقىسىن دۇرىس وتەي الماي، كلۋب تا تاراپ كەتۋى مۇمكىن.

رۋبلدىڭ قۇلدىراۋى تەك ءبىزدىڭ حوككەي مەن فۋتبولعا عانا زاردابىن تيگىزىپ قويمايدى. ودان بولەك، باسكەتبول، سۋ دوبى سپورتىنا، تەننيس، سونىمەن قاتار قىسقى سپورتىمىزعا دا كەسىرىن تيگىزۋى عاجاپ ەمەس. سەبەبى، بۇل سپورت تۇرلەرىندەگى كەي كلۋبتارىمىز رەسەي بىرىنشىلىندە ونەر كورسەتسە، كەيبىر سپورتشىلار رەسەي ازاماتى.

ال، ولاردىڭ كەلىسىمشارتتى قالاي جاساعانىن ءبىز بىلمەيمز. ەگەر، رۋبلمەن جاساسا ولار دا ارينە جالاقىلارىن وزگەرتۋدى تالاپ ەتىپ، ءبىزدىڭ سپورتتىڭ بيۋدجەتىنە زالالدارىن تيگىزەرى ءسوزسىز.

اۆتور: قاينار كەڭشىلىكوۆ

Alashainasy.kz