رۋبلدىڭ قۇنسىزدانۋى قىتاي كاسىپكەرلەرىنە ءتيىمدى

استانا. قازاقپارات - رەسەي رۋبلىنىڭ قۇنسىزدانىپ كەتۋى قىتايلىق كاسىپكەرلەر ءۇشىن ءتيىمدى بولىپ وتىر.

ولار الىپ نارىققا رەسەيلىك ارزان تاۋارلاردى تولاسسىز تاسىپ جاتىر.

بۇعان دەيىن 10 رۋبل، 2 يۋان بولسا، قازىر 1 يۋانعا دا جەتپەيدى. وسى ءساتتى پايدالانىپ قالعانداردىڭ ءبىرى جان يۋنحۋي. ول سۇرانىس ارتقان ارزان رەسەيلىك ءتاتتى تورتتاردى كوپتەپ ساتىپ العان.

ونىڭ ايتۋىنشا، رەسەي اقشاسىنىڭ قۇلدىراۋى ونىڭ بيزنەسىن وركەندەتتى. قىتايلىق كاسىپكەرلەر عانا ەمەس، شەكارالاس جەردەگى تۇرعىندار دا قازىر ارزان تاۋار تاسۋدان دامەلى.

دۋ ياجۋن، قىتايلىق كاسىپكەر:

- بۇرىن 1000 رۋبل 200 يۋان تۇرسا، قازىرگى كۋرس بويىنشا 1500 رۋبل 100 يۋانگە جەتەر جەتپەس، سوندىقتان بۇل بىزگە ءتيىمدى.

الايدا، رۋبلدىڭ تىم قۇنسىزدانىپ كەتۋى قىتاي ەكونوميكاسىنا دا اسەر ەتۋدە.

بىرىنشىدەن، كەلىسىمشارت بويىنشا ەسەپتەسۋدى رۋبلمەن جۇرگىزەتىن قىتايلىق ەكسپورتتاۋشى كاسىپورىندار زيان تارتادى. بۇدان بولەك قىتاي مەن رەسەي اراسىنداعى ەنەرگەتيكا سالاسىنداعى ءىرى جوبالار زارداپ شەگۋى مۇمكىن، - دەيدى ساراپشى حان شياوپيڭ.

حان شياوپيڭ، «ەنەرگەتيكالىق اقپارات پروۆايدەرى» كومپانياسىنىڭ ساراپشىسى:

- ەنەرگەتيكالىق بايلانىس جاعىنان رۋبلدىڭ قۇنسىزدانۋى قىتاي ەكونوميكاسىنا سونشالىقتى قاۋىپتى ەمەس، ويتكەنى بۇل سالاداعى ەسەپ ايىرسۋ دوللارمەن جۇرەدى. بۇگىندە كورشى ەلدىڭ ەكونوميكاسى السىرەپ كەتتى. ەگەر بۇلاي جالعاسا بەرسە، رۋبلدى ۇستاپ تۇرۋ ءۇشىن رەسەيدىڭ ۇلتتىق قورىنداعى اقشا جەتپەي قالۋى مۇمكىن دەپ الاڭدايمىن.

ال بۇل ءجايت قىتاي مەن رەسەي اراسىنداعى گاز تاسىمالدايتىن قۇبىردىڭ قۇرىلىسىنا قاجەتتى اقشا بولىنبەي، ەكى ەلدىڭ ەكونوميكاسىنا دا ماڭىزدى جوباعا كەرى اسەر ەتەدى دەگەن ءسوز.

24.kz