جەكسەنبى كۇنى ساۋدا ورىندارىنىڭ جۇمىس جاساۋىنا تىيىم سالىنادى

استانا. قازاقپارات - ۆەنگريادا جەكسەنبى كۇنى ساۋدا ورىندارىنىڭ جۇمىس جاساۋىنا تىيىم سالىنادى، بۇل - ادامدار ۋاقىتىن ءوز وتباسىمەن وتكىزۋ ءۇشىن جاسالىپ وتىرعان شارا، دەپ جازادى شەتەلدىك ب ا ق.

ۆەنگريا پارلامەنتى دۇكەندەر جەلىسىنىڭ جەكسەنبى جۇمىس جاساۋىنا تىيىم سالۋ تۋرالى زاڭ جوباسىن بەكىتتى.

ۆەنگريا پرەمەر-ءمينيسترى ۆيكتور وربان ادامدار دەمالىس كۇنگى ۋاقىتىن دۇكەن ارالاۋمەن ەمەس وتباسىنىڭ قاسىندا وتكىزگەن ابزال دەپ ەسەپتەيدى.

ستاتيستيكا بويىنشا، بۇل ەلدە ءار بەسىنشى تۇرعىن ۋاقىتىنىڭ كوبىن دۇكەن ارالاۋمەن جۇمسايدى ەكەن.

بەكىتىلگەن زاڭ جوباسىنا ساۋدا نۇكتەلەرىنىڭ باسشىلارى مەن قىزمەتكەرلەرى، ءتىپتى تۇتىنۋشىلاردىڭ ءوزى قارسى شىعىپ وتىر. ال ساراپشىلار بۇل دۇكەندەردەگى كىرىستىڭ ازايۋىنا، سونداي-اق جۇمىسكەرلەردى دە قىسقارتۋعا الىپ كەلەتىنىن ايتۋدا. شامامەن 20 مىڭ ادام جۇمىسسىز قالاتىن كورىنەدى. ال ۆەنگريادا جۇمىسسىزدار دەڭگەيى ونسىز دا جوعارى - 7,1 پايىز. جۇمىسسىز جۇرگەندەردىڭ كوبىسى 25 جاسقا دەيىنگى جاستار.