تاۋەلسىزدىك تولعاۋى: تاۋەلسىزدىگىمىزدىڭ دامۋ داڭعىلىن نۇرلى جولعا اينالدىرۋ بارشا قازاقستاندىقتاردىڭ قولىندا - چ. ءابۋتالىپوۆ

كوكشەتاۋ. قازاقپارات - تاۋەلسىزدىگىمىزدىڭ دامۋ داڭعىلىن نۇرلى جولعا اينالدىرۋ بارشا قازاقستاندىقتاردىڭ قولىندا.

بۇل تۋرالى «قازاقپارات» اگەنتتىگىنىڭ وڭىردەگى تىلشىسىنە اقمولا وبلىستىق ەڭبەك جانە سوعىس ارداگەرلەرى كەڭەسىنىڭ ءتوراعاسى چاپاي ءابۋتالىپوۆ ايتتى.

ونىڭ ايتۋىنشا، تاۋەلسىزدىك تۋرالى تولعانعاندا ەلىمىزدىڭ ەرتەڭگى بولاشاعى - جاستار تۋرالى دا ايتپاي كەتۋ اعاتتىق بولار. "جاس كەلسە - ىسكە" دەگەندەي، ەلباسىنىڭ ءوزى جاستار ءۇشىن بولاشاققا باستايتىن جوبالار اشىپ بەردى.

«ەلباسى «بولاشاق» باعدارلاماسى ارقىلى شەتەلدەردىڭ ءىرى جوعارى وقۋ ورىندارىندا ءبىلىم الۋلارىنا مۇمكىندىك تۋعىزدى. قازىرگى تاڭدا، ولاردىڭ الدى مەملەكەتتىك ورگانداردا ەل يگىلىگى ءۇشىن بەلدى قىزمەتتەر اتقارۋدا.

كادر دايارلاۋ ماسەلەسىنە دە ءبىز بەيجاي قاراپ وتىرمايتىن ەلمىز. بۇگىندە قازاقستاندا وقيمىن دەيتىن جاستارعا قاي قالادا، قانداي ماماندىق بويىنشا ءبىلىم العىسى كەلسە، جول اشىق. سونىڭ ءبىر ايقىن دالەلى، ءبىزدىڭ وبلىستا دا «بولاشاق» باعدارلاماسى ارقىلى شەتەل ەلدە وقىپ كەلگەن ازاماتتار بارشىلىق.

سونداي-اق، ءبىزدىڭ جالپىۇلتتىق يدەيامىز - ماڭگىلىك ەلدى باستى باعدار ەتىپ، تاۋەلسىزدىگىمىزدىڭ دامۋ داڭعىلىن نۇرلى جولعا اينالدىرۋ بارشا قازاقستاندىقتاردىڭ قولىندا. ەلباسى ايتقانداي، قاجىرلى ەڭبەكتى قاجەت ەتەتىن، كەلەشەگى كەمەل نۇرلى جولدا ءبىزدىڭ باستى بايلىعىمىز بىرلىگىمىزدى بەكەمدەپ، ايانباي تەر توگۋىمىز كەرەك.

ال ماڭگىلىك ەل - ەلدىڭ بىرىكتىرۋشى كۇشى. ەشقاشان تاۋسىلماس قۋات كوزى. ول - «قازاقستان 2050» ستراتەگياسىنىڭ عانا ەمەس، جيىرما ءبىرىنشى عاسىرداعى قازاقستان مەملەكەتىنىڭ مىزعىماس يدەيالىق تۇعىرى!» - دەيدى چاپاي ءابۋتالىپوۆ.

اۆتور: اسلان وسپانوۆ