قازاقستاننىڭ بىرنەشە بانكى يپوتەكالىق نەسيەنى تەڭگەمەن بەرۋدى توقتاتتى
يپوتەكالىق نەسيەنىڭ توقتالۋىن قازاقستاندىق بانكتەر قارىزعا بەرۋ شارتتارىن قايتا قاراۋمەن بايلانىستى دەپ ءتۇسىندىرىپ وتىر.
قازاقستاندىق بانكتەردىڭ call-ورتالىعى مالىمەتتەرى بويىنشا قازىر ءۇش بانك يپوتەكا بەرمەيدى، ولار: Kaspi Bank، قازكوممەرتسبانك پەن تەمىربانك.
قازكوم call-ورتالىعىنىڭ حابارلاۋىنشا، يپوتەكا دوللارمەن بەرىلەدى، سەبەبى قازىر تەڭگەنىڭ پايىزدىق مولشەرلەمەسى قايتا قارالىپ جاتىر. ءبىراق قازكومنىڭ باسپا ءسوز قىزمەتى بۇل مالىمەتتى جوققا شىعاردى، ايتۋلارىنشا، تەڭگەمەن يپوتەكا بەرۋ جۇيەسى توقتالعان جوق.
ال Kaspi Bank بانك ءوز شارتتارىنا بايلانىستى يپوتەكانى تەڭگەمەن دە، دوللارمەن دە بەرمەيدى. سەبەبى يپوتەكالىق نەسيە دەگەن ءونىم بانكتە 2008 - جىلدان بەرى جوق. تەمىربانك قازىرگى تاڭدا تەڭگەمەن دە، دوللارمەن دە يپوتەكالىق نەسيە بەرۋ ارىزدارىن قابىلدامايدى، سەبەبى بۇل بانكپەن اليانس بانك جانە Forte Bank بىرىكتىرىلىپ جاتىر. بانك تەك تۇتىنۋشىلىق ماقساتتا ءۇش ميلليون تەڭگەگە دەيىن نەسيە بەرە الادى.
قازىرگى تاڭدا قازاقستاننىڭ جوعارى دارەجەلى بانكتەرى اراسىندا تەڭگەمەن جانە دوللارمەن تەك بانك تسەنتر كرەديت، اليانس بانك جانە Bank RBK عانا يپوتەكالىق نەسيە بەرەدى. قالعان بانكتەر: ەۋرازيالىق بانك، تۇرعىن ءۇي جيناق بانكى، اتف بانك پەن نۇربانك يپوتەكانى تەك تەڭگەمەن بەرەدى. ال Kassa Nova Bank يپوتەكانى تەك دوللارمەن بەرەدى.
ايتا كەتەيىك، قازىر قازاقستاندىق بانكتەردە كەپىلسىز تۇتىنۋ نەسيەلەرى بۇرىنعى شارتتار بويىنشا بەرىلەدى. ءبىراق كەيبىرى تۇتىنۋ نەسيەسىن دوللارمەن بەرەدى. سونىمەن قاتار رەسەيلىك بانكتەردىڭ ىشىندە تەڭگەمەن يپوتەكا بەرۋدى سبەربانك قانا توقتاتتى، ولار مۇنى قارىز بەرۋ شارتتارىن قايتا قاراۋمەن ءتۇسىندىرىپ وتىر.
سبەربانك ماماندارىنىڭ مالىمدەۋىنشە، الەمدىك ەكونوميكانىڭ تۇراقسىزدىعىنا بايلانىستى سبەربانك نەسيەلىك ءونىمىنىڭ شارتتارىن قايتا قاراپ جاتىر. ءبىراق بۇعان دەيىن بەكىتىلگەن يپوتەكالىق نەسيەنىڭ بارلىعى بەلگىلەنگەن مەرزىمىندە بەرىلەتىن بولادى.
