استانالىق پوليتسەيلەر قالادا شىرشالاردىڭ زاڭسىز ساتىلۋىن باقىلاۋدى كۇشەيتەدى

استانا. قازاقپارات - جاڭا جىل قارساڭىندا ەلوردالىق پوليتسەيلەر قىلقان جاپىراقتى اعاشتاردىڭ ساتىلۋىنا باقىلاۋدى كۇشەيتەدى، دەپ حابارلادى ىشكى ىستەر دەپارتامەنتىنەن.

«شىرشا-2014» جەدەل الدىن الۋ ءىس-شاراسى اياسىندا پوليتسيا قىزمەتكەرلەرى ورماندى قورعاۋ ورگاندارىمەن بىرلەسە وتىرىپ استانانىڭ اينالاسىنداعى جاسىل بەلدەۋدە قىلقان جاپىراقتى اعاشتاردى زاڭسىز كەسۋ، سونىمەن قاتار ولاردى بازارلاردا جانە باسقا جەرلەردە بولشەك ساۋداعا شىعارۋ جاعدايلارىنىڭ جولىن كەسپەك، دەپ حابارلايدى ەلوردا اكىمدىگىنىڭ باسپا ءسوز قىزمەتىنەن.

تابيعاتتى قورعاۋ، جول-پاترۋل پوليتسيالارى قىزمەتكەرلەرىنەن جانە ۋچاسكەلىك پوليتسيا ينسپەكتورلارىنان قۇرالعان موبيلدى توپتار تاۋلىك بويعى رەجيمدە رەيد شارالارىن وتكىزەدى.

سونىمەن قاتار «ارالىق» جۇيەسىنىڭ بەكەتتەرىندە جانە جولداردا جول-پاترۋلدىك پوليتسيا ناريادتارى جاس قىلقان جاپىراقتى اعاشتاردى تاسىمالداۋ مەن وتكىزۋدىڭ زاڭدىلىعىن باقىلاۋدى كۇشەيتتى. رۇقسات قۇجاتتارىنسىز شىرشالاردى تاسىمالداۋ نەمەسە وتكىزۋ فاكتىلەرى بويىنشا تەكسەرۋ جۇمىستارى جۇرگىزىلەدى.

مۇنىمەن قوسا، پوليتسەيلەر ەلوردادا ورناتىلعان شىرشالاردى كۇزەتەدى. «شىرشا-2014» جەدەل الدىن الۋ شاراسى 31 - جەلتوقسانعا دەيىن جالعاسادى.