قازاقستان داعدارىستان قينالماي شىعادى - پۋتين
پۋتيننىڭ ايتۋىنشا، قازاقستان رەسەي سياقتى مۇناي ءوندىرۋشى ەل بولعاندىقتان، داعدارىستان قينالماي شىعادى.
"قازاقستان دا رەسەي سياقتى ەۋرازيالىق ەكونوميكالىق وداق شەڭبەرىندەگى ىقپالداستىق بايلانىستارىنىڭ سىرتىندا جاعىمسىز سىرتقى ەكونوميكالىق كونيۋنكتۋرامەن بەتپە-بەت كەلىپ وتىر.
ءبىز بۇل احۋالدان شىعا الامىز با؟ مەن بۇل جاعدايدان وڭ وزگەرىسپەن شىعاتىنىمىزدى ايتتىم. الەم ەكونوميكاسىنىڭ ءوسىمى مەن قۋات كوزدەرىنە دەگەن قاجەتتىلىك جاعدايىندا ءبىزدىڭ ەكونوميكالارىمىز قالاي بولعاندا دا ەنەرگەتيكالىق رەسۋرستار باعاسىنىڭ تومەندەۋىنە بەيىمدەلەتىن بولادى"، - دەدى پۋتين.
ونىڭ ايتۋىنشا، ەۋرازيالىق ەكونوميكالىق وداق كەدەرگىلەردى جويىپ، داعدارىستى وڭاي ەڭسەرۋگە مۇمكىندىك بەرەدى. "پرەزيدەنت نازاربايەۆتىڭ ءوز ۋاقىتىندا جاساعان جانە ءبىز كەيىن ينتەگراتسيا تۇرعىسىنان ىسكە اسىرعان ۇسىنىسىنىڭ ءمانى نەدە ەدى؟ تاۋارلاردىڭ، جۇمىس كۇشى مەن كاپيتالدىڭ قوزعالىسى ءۇشىن بوستاندىق كەڭىستىگىن كەڭەيتىپ، جاعدايدى بىرگە جەڭىلدەتۋ ەدى. ارينە، مۇنى بىرگە ىستەۋ وڭاي. ونىڭ ۇستىنە، كەدەن وداعى ىسكە قوسىلعاننان كەيىنگى جىلدارى ءبىزدىڭ تاۋار اينالىمىمىز 50 پايىزعا ۇلعايدى. بۇل - ايتارلىقتاي اقيقات كورسەتكىش جانە ءبىز ينتەگراتسيامەن بايلانىستى وڭ وزگەرىستەرگە يەك ارتاتىن بولامىز"، - دەدى پۋتين.
ەسكە سالا كەتەيىك، مۇنىڭ الدىندا قازاقستان پاتريوتتار پارتياسىنىڭ ءتوراعاسى عاني قاسىموۆ ەۋرازيالىق ەكونوميكالىق وداق نورمالارىن ەنگىزۋدى ءبىر جىلعا كەيىنگە قالدىرۋدى ۇسىنعان ەدى. "رەسەيدەگى ەكونوميكالىق احۋال قالپىنا كەلگەنشە ە ا ە و نورمالارىن ەنگىزۋدى ءبىر جىلعا كەيىنگە قالدىرۋدى ۇسىنامىن.
مۇنداي ەسەڭگىرەتەرلىك قۇلدىراۋدان كەيىن، ەكونوميكالىق تومەندەۋدەن كەيىن ءبىز ەكونوميكالىق تۇرعىدان باۋىرلاسا المايمىز. ولاردىڭ داعدارىسى ءبىزدىڭ جانە بەلارۋستىڭ جاعدايىن ۋشىقتىرادى"، - دەدى قاسىموۆ Tengrinews.kz تىلشىسىنە بەرگەن سۇحباتىندا.
