جول ءجۇرۋ ەرەجەسى تۋرالى جاڭا زاڭ قوعامدا نارازىلىق تۋدىردى

استانا. قازاقپارات - جاڭا جىلدان باستاپ كۇشىنە ەنەتىن "جول ءجۇرۋ ەرەجەلەرى" تۋرالى جاڭا زاڭ ەل ىشىندە قىزۋ تالقىلانۋدا.

وسى زاڭداعى كولىكتى تەك ارنايى "تۇراق" دەگەن بەلگىنىڭ استىنا قويۋ تالابى جۇرگىزۋشىلەردىڭ نارازىلىعىن تۋدىرعان ەدى.

12 جاسقا دەيىنگى بالالاردى تەك اۆتوورىندىققا وتىرعىزۋ نەمەسە ەلدى مەكەندەردە كولىكتىڭ جارىعىن جاعىپ ءجۇرۋ سىندى وزگەرىستەرگە دە ەلدىڭ ەتى بىردەن ۇيرەنە قويماۋى مۇمكىن.

ەندى ون بەس كۇننەن كەيىن جۇرگىزۋشىلەر ءۇشىن جول ءجۇرۋدىڭ جاڭا تالاپتارىنا باعىنۋعا تۋرا كەلەدى.

قوعام نارازىلىعىن تۋدىرعان تۇستار دا از ەمەس. كولىگى ساپىرىلىسقان الماتىدا تەك "تۇراق" دەگەن بەلىگىسى بار اۋماققا عانا اۆتوموبيلدى قويۋ مۇمكىن بە؟

الماتى ۇلكەن قالا، كىرىپ-شىعاتىن كولىك كوپ، وسىنى رەتتەۋ ءۇشىن تۇراق ماسەلەسىن دۇرىستاۋ، زاڭدى قاتاڭداتۋ كەرەك.

الماتىداعى 2 مىڭنان استام كوشەدەن ارنايى كولىك قاڭتاراتىن ورىنداردى ساۋساقپەن ساناپ الۋعا بولادى، دەيدى ساراپشىلار. بۇل ماسەلە تۋرالى قوعامدىق ۇيىمدار اتالعان زاڭ پارلامەنت قاراۋىنان شىققان سوڭ بىردەن دابىل قاققان بولاتىن. ناتيجەسىندە باس پروكۋراتۋرا بۇل باپتى قايتا قاراۋ تۋرالى ىشكى ىستەر مينيسترلىگىنە پارمەن بەردى.

"كولىكتەردىڭ ءوتۋ مۇمكىندىگى، جول تازالاۋ، اۆاريالىق قىزمەتتەردىڭ قوزعالىسى قيىنداپ كەتتى. الماتى ۇلكەن قالا، كىرىپ-شىعاتىن كولىك كوپ، وسىنى رەتتەۋ ءۇشىن تۇراق ماسەلەسىن دۇرىستاۋ، زاڭدى قاتاڭداتۋ ارقىلى قولعا الىنعان بولاتىن"، - دەيدى الماتى قالاسى اكىمشىلىك پوليتسيا باسقارماسى باستىعىنىڭ ورىنباسارى جاندوس مۇراتاليەۆ.

ەندى كولىك سالونىندا قانشا بالا وتىرسا، سونشا اۆتوورىندىق بولۋى شارت. سابيدەن باستاپ ون ەكى جاسقا دەيىنگى جەتكىنشەك كولىكتىڭ ارتقى ورىندىعىنا جايعاسسا دا، ارنايى كرەسلودا، بەلبەۋ تاعىپ وتىرۋعا مىندەتتى. ويتپەگەن جاعدايدا 5 ايلىق ەسەپتى كورسەتكىش كولەمىندە ايىپپۇل تولەيسىز.

بۇرىن تەك ەلدى مەكەننەن تىس جولداردا كولىكتىڭ جارىعى جانۋى ءتيىس بولسا، جاڭا جىلدان باستاپ قالا ىشىندە دە كولىكتىڭ شامىن جاعۋ مىندەتتەلەدى.

"وزگە ەلدەردىڭ تاجىريبەسىنەن الىندى بۇل. قالادا فارا جاعىپ ءجۇرۋ وزگە كولىك يەلەرىنىڭ كورۋىنە مۇمكىندىك بەرەدى. جول اپاتىن ازايتۋ ءۇشىن وسىنداي وزگەرىستەر ەنگىزىلدى"، - دەيدى جاندوس مۇراتاليەۆ.

بۇعان دەيىن جول ەرەجەسىنىڭ نورمالارىنا سايكەس تاس جولدا جىلدامدىقتى ارتتىرۋ ساعاتىنا 130 شاقىرىمعا دەيىن رۇقسات ەتىلەتىن. جاڭا زاڭعا ساي ورتاسىندا جولاعى جوق كۇرە جولداردا جىلدامدىق ساعاتىنا 100 شاقىرىمنان اسسا، زاڭ بۇزۋشىلىق بولىپ ەسەپتەلەدى. بۇل الىس ساپارعا شىققانداردىڭ قاۋىپسىزدىگى ءۇشىن ىستەلىپ وتىر، دەيدى زاڭ اۆتورلارى.

ال پوليتسيا قىزمەتكەرى جۇرگىزۋشىنى توقتاتقان سوڭ، جۇرگىزۋشى دە، جولاۋشى دا جول ساقشىسىنىڭ رۇقساتىنسىز كولىكتەن شىقپاۋى ءتيىس.

زاڭنىڭ شيكى تۇستارى بارشىلىق. تۇراققا قاتىستى باپتى قايتا قاراۋعا جىبەرتتىك. جالپى العاندا تالاپتار قاتاڭ.

"زاڭنىڭ شيكى تۇستارى بارشىلىق. وسى ەرەجەلەردى قاراستىرعان توپتىڭ كاسىبي دەڭگەيىنە ءوز باعامىزدى بەردىك. تۇراققا قاتىستى باپتى قايتا قاراۋعا جىبەرتتىك. جالپى العاندا تالاپتار قاتاڭ. ءبىراق، ونىڭ ىشىندە ادام قاۋىپسىزدىگى ءۇشىن جازىلعان باپتار دا بار. تەك ونىڭ ورىندالۋى جۇرگىزۋشىلەرگە سالماق بولايىن دەپ تۇر"، - دەيدى زاڭگەر سەرگەي ۋتكين.

جاڭا جول ءجۇرۋ ەرەجەسىنە ساي ەندى قالا اۋماعىندا ەكىنشى قاتارعا كولىكتى قويىپ كەتۋ بۇرىنعىداي ەسكەرتۋمەن شەكتەلمەي، 10 ايلىق ەسەپتى كورسەتكىش تۇرىندەگى ايىپپۇلدى قاراستىرادى.

سول سياقتى اەروگرافيا، ياعني كولىك سىرتىنا "سۋرەت" جاپسىرۋ 5 ايلىق ەسەپتى كورسەتكىش بويىنشا ايىپپۇل تولەۋگە ماجبۇرلەمەك. قىسقاسى، بارلىعى 20-دان استام وزگەرتۋلەر مەن تولىقتىرۋلاردى جۇرگىزۋشى جادىنا توقىپ الۋعا مىندەتتى. زاڭ رەسمي باسپا سوزدە جاريالانعان سوڭ ون كۇن ىشىندە كۇشىنە ەنەدى.

«استانا» تەلەارناسى