اق ايۋلار نەگە سولاقاي بولادى؟

استانا. قازاقپارات - «سولاقاي» جانە «وڭقاي» سوزدەرى تەك ادامعا قاتىستى قولدانىلمايدى.

مىسالى، مىسىق تەكتى جانۋارلاردىڭ كوبى وڭقاي، تىشقانداردىڭ %28 ى سولاقاي، 44% ى وڭقاي، ال قالعانى امبيدەكسترلەر. بۇل - ەكى قولى دا بىردەي دامىعاندار دەگەن ءسوز. سولتۇستىكتىڭ سۋىعىندا تىرشىلىك ەتەتىن اق ايۋلاردىڭ ءبارى سولاقاي ەكەن.

ارينە جانۋارلاردىڭ ادامدارمەن سالىستىرۋعا كەلەتىن قولى جوق. ءبىراق، ەسكيموستاردىڭ اڭىزدارىندا اق ايۋدىڭ سول اياعى مىقتى بولاتىنى تۋرالى ايتىلادى. ءتىپتى اڭعا شىققاندا دا سوققىعا جىعاتىن سول اياعى ەكەن.

دەگەنمەن، بۇل عىلىمي تۇرعىدان راستالماعان. عالىمدار اق ايۋدىڭ ەكى اياعى دا بىردەي دامىعانىن ايتادى. ايتكەنمەن، اركتيكانىڭ قاقاعان سۋىعىندا ايۋ جىلى جۇنمەن قاپتالماعان مۇرنىن وڭ اياعىمەن جاۋىپ جۇرۋگە داعدىلانعان. سوندىقتان، باسقا ارەكەتتى سول اياعىمەن ورىندايتىن بولار.

بورسىق، لەمۋر، توتىقۇس پەن ءىرى تەڭىز شايانى دا تابيعاتىنان سولاقاي.

تاعى ءبىر قىزىق دەرەك. اۆسترياداعى ۆەنا ۋنيۆەرسيتەتىندەگى ءبىر توپ ەتولوگتار (جانۋارلاردىڭ مىنەز-قۇلقىن زەرتتەيتىن عالىمدار) سەگىزاياقتىڭ سەگىز بىردەي اياعى بولسا دا، ول ۇنەمى بىرەۋىن عانا قولدانۋدى ءجون كورەتىنىن بايقاعان. سەگىزاياقتار بەلگىسىز ءبىر نىساننىڭ الدىنا كەلىپ قالعان كەزدە ونى سول ءبىر اياعىمەن تۇرتكىلەپ كورەدى.

massaget.kz