سارى اۋليەنىڭ سىرى
ول سۋرەتتەگى جاس قىزدى ءوزىنىڭ اق نەكەلى ايەلى ەكەنىن ايتتى. «سۋرەتتەگى قىز مەنىڭ اق نەكەلى ايەلىم. ەسىمى - گۇليار. بەس اي بولدى، شاريعات جولىمەن نەكەمىزدى قيدىردىق. بىرگە ءومىر ءسۇرىپ جاتىرمىز. بۇگىندە يسلام جولىن ۇستانىپ، ونىڭ پارىزدارىن ورىنداۋعا، ياعني ناعىز مۇسىلمان ايەلى بولۋعا تىرىسىپ ءجۇر. ءبارىن ءوزىم ۇيرەتىپ جاتىرمىن»، - دەيدى سارى اۋليە. ول قىزعا قۇدا ءتۇسىپ، اكە- شەشەسى مەن باۋىرلارىنىڭ رۇقساتىن العانىن دا جەتكىزدى. گۇليار وعان ەم قابىلداۋعا كەلگەن ەكەن. ەمشى قىزدىڭ جاسى وزىنەن الدەقايدا كىشى ەكەنىن دە جاسىرمادى. «ءبىزدى اقتوبەلىك البينا ەسىمدى قارىنداسىم تانىستىرعان. اتا- اناسى دا مەنى جاقسى تانيدى. قىزدارىنىڭ مەن سەكىلدى ءدىني ساۋاتتى، مۇسىلمان ازاماتتىڭ ەتەگىنەن ۇستاعانىنا قۋانىپ ءجۇر. ارامىزدا 34 جىل جاس ايىرماشىلىعى بار. قازىر جاسى 18 دە. اللا بۇيىرتسا، كەلەسى جىلدىڭ ورازاسى بىتكەن سوڭ ۇيلەنۋ تويىن جاسايمىز»، - دەيدى ەمشى.
سارى اۋليە ءوزىنىڭ جاس قىزعا ۇيلەنۋىنە بايبىشەسىنىڭ مۇلدە قارسى ەمەستىگىن، ءتىپتى كۋاگەر بولعانىن ايتاپ ماقتاندى. سونداي- اق، ول ءوزىنىڭ ەمدەۋ سەانسىنا نەلىكتەن 4 مىڭ دوللار الاتىنىن دا ءتۇسىندىردى.
«مەنىڭ ەكى ءتۇرلى ەمىم بار. بىرەۋى - تەگىن. ول كوپشىلىك جاماعات بولعان ۋاقىتتا جاسالاتىن ەم. ال كەيبىر ادامدار ونى قاناعات تۇتپاي، جەكە ەمگە جازىلاتىن بولسا، ونىڭ قۇنى 4 مىڭ دوللاردان جوعارى بولادى. ەڭ تومەنگى باعا - 4 مىڭ دوللار»، - دەيدى ول.
سارى اۋليە بۇل باعادان شوشىنباۋ كەرەكتىگىن ايتتى. سەبەبى، ونىڭ دارەجەسىندەگى ادامدار 15-20 مىڭ دوللارعا دا سويلەسپەيدى ەكەن. ويتكەنى، 200-300 مىڭ دوللاردان ميلليون دوللارعا دەيىن كۇردەلى ەم جاساپ ۇيرەنگەن.
ءسوز سوڭىندا ەمشى قازىرگى جارى گۇلياردى پاك كۇيىندە العاندىقتان، وعان ءوز تەگىن بەرگەنىن ايتقان. سونداي- اق، ءوزىنىڭ كوپ ايەل الۋىن قازاق سانىن كوبەيتۋ ءۇشىن دەپ تۇسىندىرەدى. الايدا، گۇلياردان بالا سۇيۋگە اسىقپايدى. «ەندى ۇيلەنبەيمىن، وسىمەن توقتايمىن. مەنىڭ كوپ ايەل الۋداعى ماقساتىم - التىن اسىقتى ازاماتتاردىڭ سانىن كوبەيتۋ. شۇكىر دەيىن، 9 ۇل، 7 قىز تاربيەلەپ وتىرمىن. ەندى گۇلياردان ۇرپاق سۇيسەم دەگەن نيەتىم بار. ءبىراق بۇل جاعىنان قازىرشە اسىعىپ وتىرعان جوقپىز. ءبىراز ۋاقىت قاسىمدا ەلىكتىڭ لاعىنداي ۇلپىلدەپ، ەركەلەپ جۇرە تۇرعانىن قالايمىن»، - دەيدى ەمشى.
ايتپاقشى، سارى اۋليە وزىمەن ءۇي ماسەلەسى بويىنشا داۋلاسىپ جۇرگەن قىزى باقىتگۇلدەن اللا الدىندا باس تارتقان ەكەن. ەسكە سالا كەتەيىك، سارى اۋليە جاس قىزبەن تۇسكەن فوتولارىن الەۋمەتتىك جەلىگە جاريالاپ، ەلدى تاڭ قالدىرعان بولاتىن.
aikyn.kz
