مەدۆەدەۆ رۋبل باعامىنا قاتىستى پىكىرىن ءبىلدىردى

استانا. قازاقپارات - ۆاليۋتالاردىڭ رۋبلگە قاتىستى باعامى ر ف ەكونوميكاسىنا قولايلى دەڭگەيدەن نەگىزسىز تۇردە شىعىپ كەتتى، ازاماتتارعا دوللار مەن ەۆرونى قازىرگى باعامى بويىنشا ساتىپ الۋ ءتيىمسىز بولىپ تۇر. رەسەي پرەمەر-ءمينيسترى دميتري مەدۆەدەۆ وسىلاي دەپ مالىمدەدى، بۇل تۋرالى ر ي ا نوۆوستي حابارلايدى.

«سوڭعى بىرنەشە كۇن ىشىندە ءبىزدىڭ ايىرباس پۋنكتتەرىنەن كورىپ وتىرعان سيفرلارىمىز وبەكتيۆ كورىنىسكە سايكەس كەلمەيدى جانە ەكونوميكا ءۇشىن ىڭعايلى دەڭگەيدەن نەگىزسىز تۇردە شىعىپ كەتتى»، - دەدى مەدۆەدەۆ ۇكىمەت مۇشەلەرىمەن جانە ءىرى كومپانيا باسشىلارىمەن بىرگە وتكەن كەڭەستە.

«مۇنداي جاعدايدا ۆاليۋتالاردى ساتىپ الۋعا قاتىستى قاۋىپتەنۋ تۇسىنىكتى، ءبىراق سونىمەن بىرگە ءبىز بۇل جاعدايدا ۆاليۋتالاردى ساتىپ الۋ ولاردى ءتيىمسىز باعام بويىنشا ساتىپ الۋ ەكەنىن ەسكەرۋىمىز كەرەك»، - دەدى رەسەي پرەمەر-ءمينيسترى.

مەدۆەدەۆ مۇناي باعاسىنىڭ تومەندەۋى مەن باتىس سانكسيالارىنىڭ رۋبل باعامىنا كەرى اسەر ەتىپ جاتقانىن ايتتى. «ارينە، ءبىز بارىنە بەلگىلى، ءبىراق ءبىزدىڭ ەلدىڭ ارەكەتىنە بايلانىستى ەمەس ەكى نەگىزگى فاكتورعا تاۋەلدى ماسەلەلەرگە جانە سىن-قاتەرلەرگە كەزىگىپ وتىرمىز. بۇل - مۇناي مەن باسقا دا ءبىرقاتار شيكىزات تاۋارلار باعاسىنىڭ سوزىلمالى تۇردە تومەندەۋى جانە جاعىمسىز سىرتقى ساياسي اسەر. مەن سانكسيالاردى ايتىپ تۇرمىن. ءبىزدىڭ بانكتەر مەن كومپانيالاردىڭ بۇرىنعى قارجى نارىقتارى تۇگەل جابىلدى. ارينە، رۋبل بۇعان ارەكەت ەتە الماي تۇرمايدى»، - دەدى ول.

ايتا كەتەيىك، كەشە، 16- جەلتوقسان كۇنى دوللار باعامى تاريحتا تۇڭعىش رەت 80 رۋبل، ال ەۆرو 100 رۋبل دەگەن شەشۋشى دەڭگەيدەن اسقان بولاتىن. ماسكەۋ ۋاقىتى بويىنشا ساعات 19.00 داعى مالىمەتكە قاراعاندا، ءبىر دوللار 67,66 رۋبل، ەۆرو 84,5 رۋبل دەڭگەيىندە ساۋدالانعان. مۇنىڭ الدىندا رۋبل باعامىنىڭ بيۆاليۋتالىق سەبەتتە 1998-جىلدان بەرى تۇڭعىش رەت كۇشتى قۇلدىراۋدى باستان وتكەرگەنى حابارلانعان بولاتىن. باعام 10 پايىزعا تومەندەدى. ءبىر كۇن ىشىندە ۆاليۋتالار التى رۋبلگە جوعارىلاپ كەتتى.

tengrinews.kz