تاريحشىلار قازاقتىڭ ويۋ-ورنەگىن بيزنەسكە اينالدىرعان ديزاينەرلەرگە قارسى شىقتى

استانا. قازاقپارات - قازاقتىڭ ويۋ-ورنەكتەرى توڭىرەگىندە ۇلكەن داۋ باستالعالى تۇر.

ۇلتتىق قۇندىلىعىمىزدىڭ قازىرگى قولدانىسىنا كوڭىلى تولماعان تاريحشىلار ونىڭ كيىم-كەشەكتەرگە بەتالدى تىگىلە بەرۋىنە قارسى.

ايتۋلارىنشا، قالتانىڭ قامىن كوزدەگەن ديزاينەرلەر حالىق ونەرىن قالاي بولسا سولاي پايدالانىپ ءجۇر. ياعني قازاقتار ەجەلگى داۋىردەن كوزىنىڭ قاراشىعىنداي ساقتاپ كەلە جاتقان كونە ونەردى بەيبەرەكەت بۇرمالاپ، ال ويۋلارىمىزدى ويىنشىق ەتكەن.

يرينا ەروفەيەۆا - كوشپەندىلەردىڭ تىنىس-تىرلىشىگىن زەرتتەۋمەن اينالىساتىن قازاق عىلىمي ينستيتۋتىنىڭ ديرەكتورى. كەلىنشەكتى قازاق ويۋ-ورنەگىنىڭ قازىرگى احۋالى قاتتى الاڭداتقان.

يرينا ەروفەيەۆا، كوشپەندىلەردىڭ مادەني مۇراسى ماسەلەلەرى بويىنشا قازاق عىلىمي زەرتتەۋ ينستيتۋتىنىڭ ديرەكتورى:

- قازىرگى ديزاينەرلەر قازاق تاريحىنان مۇلدە حابارسىز. ويۋ-ورنەكتەردى ءارقايسىسى بەيبەرەكەت ءارى ورىنسىز پايدالانىپ ءجۇر. ماسەلەن، كيىمدەرىن ساتۋ ماقساتىندا ولار ويۋلاردى تىم ۇلكەيتىپ نەمەسە ءپىشىنىن مۇلدەم وزگەرتە سالادى. بۇل دۇرىس ەمەس قوي! سوندىقتان، ولارعا قاتاڭ شارا قولدانۋ كەرەك دەپ ەسەپتەيمىن.

تاريحشىنىڭ ايتۋىنشا، اسىرەسە قازىرگى ديزاينەرلەر ارزان اتاق پەن ءساننىڭ سوڭىنا ەرىپ، سالت-ءداستۇردى ساقتاۋدى مۇلدەم قويعان. قىزعا دا، كەلىنشەككە دە بىردەي ويۋلاردى پايدالانا بەرەدى ەكەن.

تەك قولونەردىڭ قىر-سىرىن ابدەن مەڭگەرگەن ايگۇل تاريحشىلاردىڭ تاققان بۇل سىنىمەن مۇلدەم كەلىسپەيدى. بەلگىلى ديزاينەر قازاق ويۋ-ورنەگىن كويلەكتىڭ جەڭىنە دە، ەتەگىنە دە ءتۇر-تۇرىمەن تىگىپ ءجۇر.

ايگۇل جانسەرىكوۆا، ديزاينەر:

- نەگە بولماسقا؟ بولۋ كەرەك دەپ ويلايمىن مەن. ويۋدى بىلاي دا بىلاي دا ءارتۇرلى قىلىپ كەلتىرىپ، ەرەكشە قىلىپ جاساپ جاتقان ديزاينەرلەردى تەك قانا قولدايمىن. مۇمكىن كەلەشەكتە بۇنى تۇسىنەتىن ادامداردىڭ سانى كوبەيەدى. ويتكەنى ءبىر كەزدە ءبىز مۇلدەم قازاقتىڭ كيىمىنەن ءوزىمىزدىڭ كيىم-كەشەگىمىزدە قازاقتىڭ ويۋلارىن جوعالتىپ الدىق.

ءوزىنىڭ جەكە كيىمدەر توپتاماسى بار سانگەر، ءتىپتى، قىزدارعا دا ارناپ ۇزىن شاپاندار تىككەن. وعان «قوشقار ءمۇيىز»، «قوس ءمۇيىز»، «شىتىرمان» دەپ اتالاتىن ءتۇرلى ويۋلاردى پايدالانىپتى. اراسىندا ءوزى دە ويلاپ تاپقان ويۋى بار.

 حالىق قاراسى قالىڭ الماتى قالاسىنىڭ قاق ورتاسى. قايدا قاراساڭ دا يتاليالىق تەرىدەن نەمەسە قىتايدىڭ جۇنىنەن تىگىلگەن كيىمىن كيگەن جۇرت. ال ادەمىلىك پەن ءساندى ەرەكشە ۇستاناتىندار ءتىپتى سوناۋ رەسەيدەن دە يلەنگەن ءتۇرلى تونداردى الدىرىپ جاتادى. تەك وسىناۋ كيىم ونەركاسىبىنىڭ ىشىندە قازاقتان شىققان، ءتىپتى، قولعاپ تا جوق.

ktk