ۇرىمجىدە قازاقستاننىڭ تاۋەلسىزدىك كۇنى تويلاندى
قازاقستان مەن ق ح ر-نىڭ ءان ۇرانىمەن شىمىلدىعىن اشقان بۇل شاراعا پاسپورتتىق-ۆيزالىق قىزمەت ورنىنىڭ قىزمەتكەرلەرى مەن قازاقستاننىڭ ءۇرىمجى قالاسىنداعى ستۋدەنتتەرىنەن سىرت، ۇرىمجىدەگى ءبىر ءبولىم زيالى قاۋىم وكىلدەرى قاتىناستى. پاسپورتتىق-ۆيزالىق قىزمەت ورنىنىڭ باستىعى ەرجىگىت قالمىرزايەۆ قارسى الۋ ءسوزىن سويلەدى. «بيىل 16-جەلتوقساندا قازاقستان رەسپۋبليكاسى تاۋەلسىزدىك العانىنا 23 جىل تولادى. وسى 23 جىلدا قازاقستاننىڭ ەكونوميكالىق قۋاتتى ۇزدىكسىز نىعايىپ، مەملەكەتتىك قۋاتى ارتتى. قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازاربايەۆتىڭ باسشىلىعىندا ۇدەرە العا تارتقان قازاقستان حالقى دۇنيە ءجۇزىنىڭ بەيبىت دامۋىنا دا ورسان زور ۇلەستەر قوستى. ەلىمىزدىڭ يادرولىق قارۋدان ءوز ەركىمەن باس تارتۋى انە سونىڭ ايعاعى»،-دەدى ول. سونىمەن بىرگە، قازاقستان مەن قىتاي دەيپلوماتيالىق قاتىناس ورناتقاننان بەرى كوپتەگەن سالالاردا تىعىز قارىم-قاتىناس ورناتىپ عانا قالماي، وڭىرلىك بەيبىتىشلىكتى دامىتۋ تۇرعىسىنان دا كەلەلى كەلىسىمدەر جاساسقانىن؛ قازىر قازاقستان مەن قىتاي اراسىنداعى ساۋدا قاتىناسى قارقىندى ءجٷرىلىپ جاتقانىن ايىرىقشا اۋىزعا العان ەرجىگىت قالمىرزايەۆ ەكى ەل اراسىنداعى ساۋدا سوماسى 2000-جىلى 1 ميلليارد دوللار شاماسىندا بولسا، 2013-جىلى بۇل كورسەتكىش 28 ميلليارد دوللارعا دەيىن كوتەرىلگەنىن جەتكىزدى.
شاردا ءسوز سويلەگەن اۆتونوميالى رايوندىق حالىق ۇكىمەتى سىرتقى ىستەر كەڭسەسىنىڭ ورىنباسار مەڭگەرۋشىسى ۋ گۋاڭرۇڭ: جۇڭگو مەن قازاقستان ىنتماعى جاراسقان دوس كورشى ەلدەر. ەكى ەل اراسىنداعى بارىس-كەلىستىڭ دە تامىرى تەرەڭدە. ديپلوماتيالىق قاتىناس ورناتقاننان بەرى ەكى ەلدىڭ ەكونوميكا، ساۋدا-ساتتىق، ەنەرگيا، وڭىرلىك حاۋىپسىزدىك، قاتىناس-تاسىمال، وقۋ-اعارتۋ، مادەنيەت سياقتى سالالارداعى سەلبەستىگى نىعايىپ، ەكى ەل حالقىنىڭ دوستىعى ءتىپتى تەرەڭدەي ءتۇستى. بيىل قىركۇيەك ايىندا ءتوراعا شي جينپيىڭ قازاقستانعا ساپارلاي بارعاندا «جىبەك جولى ەكونوميكالىق بەلدەۋى» وي جەلىسىن ورتاعا قويدى. بۇل ەكى ەل سەلبەستىگىن دامىتۋدىڭ تاعى ءبىر تىڭ جولى دەپ ايتۋىمىزعا بولادى،- دەدى ءارى قازاقستان رەسپۋبليكاسى تەمىرجول كومپانياسىنىڭ ءۇرىمجى قالاسىنداعى پاسپورتتىق-ۆيزالىق قىزمەت ورنىنىڭ ەكى ەلدىڭ دوستىق قارىم-قاتىناسىنىڭ نىعايۋىنا، قىتايمەن مەن قازاقستان حالقىنىڭ بارىس-كەلىسىنىڭ جيىلەۋىنە ەسەلەلى ەڭبەك سىڭىرگەنىنە ريزاشىلىعىن ءبىلدىردى.
قالياكبار ۇسەمقان ۇلى(شينجياڭ گازەتى)
