ن. نازاربايەۆ پاكىستان پرەزيدەنتىنە پەشاۆارداعى تەررورلىق اكتىگە بايلانىستى كوڭىل ايتتى

استانا. قازاقپارات - مەملەكەت باسشىسى نۇرسۇلتان نازاربايەۆ پاكىستان يسلام رەسپۋبليكاسىنىڭ پرەزيدەنتى مامنۋن حۋسەينگە پەشاۆار قالاسىندا بولعان تەررورلىق اكتىگە بايلانىستى كوڭىل ايتۋ جەدەلحاتىن جولدادى، دەپ حابارلادى اقوردانىڭ باسپا ءسوز قىزمەتى.

جەدەلحاتتا باسىم كوپشىلىگى مەكتەپ جاسىنداعى بالالار بولعان، كوپتەگەن جازىقسىز جانداردىڭ قازا تاپقانى تۋرالى سۋىت حاباردى مەملەكەت باسشىسى تەرەڭ كۇيزەلىسپەن قابىلداعانى ايتىلعان.

«قازاقستان بارشا الەمدەگى قاۋىپسىزدىك پەن بەيبىتشىلىككە ۇلكەن قاۋىپ ءتوندىرىپ وتىرعان حالىقارالىق ەكسترەميزم مەن تەرروريزمنىڭ ءىس-ارەكەتتەرىن ءۇزىلدى-كەسىلدى ايىپتايدى. پەشاۆارداعى جانتۇرشىگەرلىك وقيعا راديكالدى توپتارعا وركەنيەتتى قوعامدا ورىن جوق ەكەنىن تاعى دا راستادى»، - دەلىنگەن جەدەلحاتتا.

قازا بولعانداردىڭ وتباسىلارى مەن تۋعان-تۋىستارىنا، سونداي-اق بۇكىل پاكىستان حالقىنا قازاقستان حالقىنىڭ جانە جەكە ءوز اتىنان كوڭىل ايتقان نۇرسۇلتان نازاربايەۆ تەررورلىق ارەكەتتەن جاپا شەككەندەردىڭ تەزىرەك ساۋىعىپ كەتۋىن تىلەدى.