تاۋەلسىزدىك تولعاۋى: ايتىسكەر اقىن ا. تۇرسىنبايەۆا: اتا-بابالارىمىزدىڭ ازاتتىق جولىنداعى توگىلگەن قانى - تاۋەلسىزدىكتىڭ قاسىرەتتى دە قاسيەتتى قۇنى
«تاۋەلسىز ەل» دەگەننەن اسقان قاسيەتتى ۇعىم جوق. ونىڭ قادىرىن ءاربىر ازامات جۇرەگىمەن ءتۇسىنىپ، قاستەرلەي ءبىلۋى كەرەك. بۇل اتا-بابادان قالعان اسىل مۇرا. بۇل ۇزاق عاسىرعا سوزىلعان بىلەكتىڭ كۇشىمەن، نايزانىڭ ۇشىمەن كەلگەن قۇندىلىق.
قانشاما باتىرلار مەن بوزداقتار ءوز ومىرلەرىن قۇرباندىققا قيىپ، بىزگە بەيبىت ءومىردى جەڭىپ بەردى. اندەرىمىزدە «قول جەتتى مىنە، اڭساعان كۇنگە»، - دەپ جىرلاعانىمىزداي، تاۋەلسىزدىك - اتا-بابالارىمىزدىڭ ارمانداپ كەتكەن اسقاق ارمانى ەكەندىگىن ايتۋدان جالىقپايمىن.
«بەس ارىس»، «ءۇش بايتەرەك» جانە «الاشورداشىلار»، ۇلى وتان سوعىسىندا وتان ءۇشىن وتقا تۇسكەن باتىرلارىمىز، جەلتوقسان قۇرباندارى - وسى قانتوگىستىڭ بارلىعى ءبىزدىڭ بۇگىنگى تاۋەلسىزدىگىمىزدىڭ قاسىرەتتى دە قاسيەتتى قۇنى»، - دەدى بەلگىلى اقىن.
سونداي-اق، ايتىسكەر اينۇر تۇرسىنبايەۆا بارشا حالىقتى تاۋەلسىزدىك كۇنى مەرەكەسىمەن قۇتتىقتاپ، ىستىق ىقىلاسىن ءبىلدىردى.
«بۇگىندە ءبىز بەرەكەسى مەن ىنتىماعى جاراسقان، جاستارعا مول مۇمكىندىك سىيلاعان، بولاشاعى جارقىن ەلدە ءومىر سۇرۋدەمىز. وسى ورايدا، ەلباسىنىڭ ەڭبەگى ەرەن ەكەندىگىن اتاپ ءوتۋ پارىز. تاۋەلسىزدىكتى تۋ ەتىپ، كوككە جەلبىرەتەتىن مىنا بىزدەر، بارشا حالىق. ءاربىر قازاقستاندىق جاقسى ءومىر سۇرسە، قوعام دا، مەملەكەت تە دامي تۇسەدى، ەگەمەندىگىمىز ەڭسەلى بولادى. ەلىمىزدىڭ ءاربىر وتباسىنا، ءاربىر ازاماتىنا زور دەنساۋلىق، ىنتىماق-بىرلىك، باقىتتى عۇمىر مەن مول تابىس تىلەيمىن! تاۋەلسىزدىك كۇنى مەرەكەسى قۇتتى بولسىن!» - دەدى ول.
اۆتور: قانات مامەتقازى ۇلى
