تاۋەلسىزدىك تولعاۋى: التىناي جورابايەۆانىڭ تاۋەلسىزدىك كۇنىنە ارنالعان «قازاقستانىم، العا» اتتى كونسەرتى ءوتتى
استانا قالالىق اكىمدىگى مەن ق ر مادەنيەت جانە سپورت مينيسترلىگىنىڭ قولداۋىمەن وتكەن ءان كەشىنە التىنايدىڭ ونەردەگى ارىپتەستەرى جۇبانىش جەكسەن ۇلى، ايگۇل يمانبايەۆا، قايرات نۇرتاس، ساكەن مايعازيەۆ جانە ءىنىسى تالعات جورابايەۆ قاتىسىپ، ءوز ونەرلەرىمەن ءبولىستى.
وتاندىق ەسترادامىزدا وزىندىك ەرەكشە داۋسى بار ءانشى قىزىن تىڭدارماندارى دا قاتتى ساعىنىپ قالىپتى.
سەبەبى، التىناي سوڭعى رەت 2004 - جىلى جەكە كونسەرتىن بەرگەن ەكەن. ارادا 10 جىل وتكەننەن كەيىن بۇگىن ەلىمىزدىڭ ۇلىق مەرەكەسى - تاۋەلسىزدىك كۇنى قارساڭىندا تىڭدارماندارىمەن قايتا جۇزدەستى.
التىناي بۇگىندە تەك تانىمال ءانشى عانا ەمەس، ءتورت بىردەي قىزدى ءوسىرىپ وتىرعان اياۋلى جار، كوپ بالالى انا ەكەنىن دە ەستەن شىعارماۋىمىز كەرەك. بۇگىنگى كونسەرتىندە التىنايمەن بىرگە ساحنادا سول ءتورت قىزى دا ورتاعا شىعىپ، ءوز ونەرلەرىن كورسەتتى. اناسى قۇيقىلجىتا ءان سالسا، سۇيىكتى قىزدارى بيدەن شاشۋ شاشتى.
ەستەرىڭىزگە سالا كەتەيىك، التىناي جورابايەۆا ۇلكەن ساحناعا العاش رەت 1997 - جىلى شىعىپ، وبلىستىق «اراي» بايقاۋىندا جۇلدەگەر، ال رەسپۋبليكالىق «جاس قانات-97» بايقاۋىندا ديپلومانت اتانعان. ودان كەيىن دە ورىنداۋشىلىق شەبەرلىگىن ۇزدىكسىز ۇشتاۋ ارقاسىندا 2001 -جىلى الماتىداعى ХІІ حالىقارالىق «ازيا داۋسى» بايقاۋىندا، 2004 - جىلى بولگاريانىڭ ۆارنا قالاسىنداعى ХІІ حالىقارالىق «Discovery» بايقاۋىندا، 2005 - جىلى مىسىردىڭ كاير قالاسىنداعى ІІ حالىقارالىق «الەكساندريا» ءان بايقاۋىندا لاۋرەات بولدى. 2003 -جىلى بەلورۋسسيادا ХІІ حالىقارالىق «سلاۆيان بازارى» بايقاۋىندا ديپلومانت، 2004 - جىلى لاتۆيانىڭ يۋرمالا قالاسىندا V حالىقارالىق «يانتار جۇلدىزى» بايقاۋىندا باس جۇلدە (گران- پري) جانە 2005 - جىلى ا ق ش- تاعى گولليۆۋدتا وتكەن ورىنداۋشىلىق شەبەرلىكتىڭ الەم چەمپيوناتىندا ەكى التىن، ەكى كۇمىس مەدالدى يەلەندى.
سونداي-اق 2004 - جىلى «دارىن» مەملەكەتتىك جاستار سىيلىعىنىڭ لاۋرەاتى، 2006 - جىلى قازاقستان رەسپۋبليكاسىنىڭ ەڭبەك سىڭىرگەن قايراتكەرى، 2008 - جىلى قازىعۇرت اۋدانىنىڭ قۇرمەتتى ازاماتى اتاعىنا قول جەتكىزدى.
التىناي جورابايەۆانىڭ العاشقى اۋديو البومى 2002 - جىلى «ارمانىما عاشىقپىن» دەگەن اتپەن شىققان بولاتىن. ال «ءومىر- وزەن» اتتى العاشقى جەكە كونسەرتى 2004 - جىلى «قازىعۇرت» ونەر ورتالىعىنىڭ ۇيىمداستىرۋىمەن الماتىداعى رەسپۋبليكا سارايىندا ءوتتى. «ءجۇرشى، ساۋلەم، اۋىلعا»، «ەلىمنىڭ جۇرەگى - استانا» دەگەن ءۇنتاسپا البومدارى مەن «ءومىر- وزەن» اتتى بەينەتاسپا البومى جارىققا شىقتى. قازىرگى تاڭدا التىناي 4 قىزدى تاربيەلەپ وتىرعان اياۋلى انا، اسىل جار.
كۇنسۇلتان وتارباي
