قازاق ۇلتىنىڭ ونەرىندە مەنى وزىنە باۋراپ العان دۇنيەلەر وتە كوپ - ە. ليبراندا
ويتكەنى، بۇل ەلدە ادامي قارىم-قاتىناس، سىيلاستىق، ءوزارا قۇرمەت، سىپايگەرشىلىك جانە رۋحاني دۇنيەلەرگە دەگەن وڭدى كوزقاراس جاقسى قالىپتاسقان.
بۇنداي پىكىردى مۋزىكانت، ءان وڭدەۋشى كريسس كريستوفەر ەليازار ليبراندا ءبىلدىردى.
«ادام بالاسىنا تابيعاتتان بەرىلەتىن مۇنداي قاسيەتتەردى جوعالتپاي، ونى قوعامنىڭ باستى قۇندىلىعى دەپ قاراۋ قازاقستان حالقىنىڭ باستى ەرەكشەلىكتەرىنىڭ بىرەگەيى دەپ بىلەمىن. كوشەدە، كوپشىلىك ورىنداردا ءبىر-بىرىنە ءىلتيپات ءبىلدىرىپ، ۇلكەندەر جاعى كىشىلەرگە ىزەتىن، جاستار اعا بۋىن وكىلدەرىنە قۇرمەتىن كورسەتىپ جاتقان ادامداردىڭ جاراسىمدى ءىس-ارەكەتتەرىنە قىزىعا قارايسىڭ.
مىسالى، اس ءىشىپ وتىرساڭ، سەنى تانىسىن، تانىماسىن «اسىڭىز ءدامدى بولسىن» دەپ جانىڭنان رياسىز كوڭىلمەن باسىن يزەپ وتەدى. ءماز بولىپ قالاسىڭ. جول سۇراساڭ قالبالاقتاپ، بار مۇمكىندىگىنشە كومەكتەسىپ، دۇرىس باعىتتى كورسەتىپ جىبەرەدى. تالاي ەلدە بولدىم، ءبىراق مۇندايدى وتە سيرەك كەزدەستىرەسىڭ.
قازاقستان دامىپ جاتقان، كەلەشەگىنە سەنىمدى ەل دەپ ەسەپتەيمىن. جەرىنىڭ استى مەن ءۇستى بايلىققا تولى. بۇل - قازاقتىڭ كەڭ پەيىلى مەن دارحان كوڭىلىنە وراي جاراتقاننان بەرىلگەن سىي. قازاق حالقىنىڭ قوناقجايلىعى بارشا الەمگە بەلگىلى.
قازاقتار «كەڭ بولساڭ، كەم بولمايسىڭ» دەگەن ءسوزدى ءجيى ايتادى ەكەن. وسى ءبىر اۋىز ءسوزدىڭ توركىنىنە ۇڭىلسەڭ، كوزىڭ اشىلا تۇسەدى. راسىندا، قايىرىمدىلىق، مەيىرىمدىلىك، ىزگىلىك دەگەن اسىل قاسيەتتەر كەڭدىكتىڭ بەلگىسى عوي. ال وسىنداي قاسيەتتەردى بويىنا جيناعان ادامداردان قۇرالعان قوعام، ەل كىمدى دە بولسا وزىنە تارتپاي قويمايدى.
قازاق ۇلتىنىڭ ونەرىندە مەنى وزىنە باۋراپ العان دۇنيەلەر وتە كوپ. سولاردىڭ ءبىرى - دومبىرا. وسى مۋزىكالىق اسپاپتىڭ مۇمكىندىكتەرىنە تاڭعالاسىڭ. فيليپپيندە ءداستۇرلى مۋزىكالىق اسپاپتار كوپ. الايدا سولاردىڭ ءبىرى دە زامان اعىمىنا دومبىرا سەكىلدى ىلەسە المادى. ال دومبىرا بولسا زاماناۋي مۋزىكالاردى ورىنداۋدا ءساتتى قولدانىلىپ ءجۇر. بۇعان قالاي رازى بولمايسىڭ؟! تاعى ءبىر ايتار جايت، ماعان قازاق كومپوزيتورلارىنىڭ اندەرى وتە ۇنايدى. قازاق اندەرى كەڭ تىنىستى، اسەرلى، قۇلاققا جاعىمدى تيەدى.
بۇل جەرگە كەلگەنىمە ءۇش جىلدىڭ ءجۇزى بولىپ قالىپتى. وسى ارالىقتا قازاقستاننىڭ الەم الدىنداعى بەدەلى كۇن ساناپ ءوسىپ كەلە جاتقانىن، ىشكى بىرلىگى نىعايىپ، ەل بولۋدىڭ جارقىن ۇلگىسىن وزگەگە ۇسىنا بىلەر جاعدايعا جەتكەنىن انىق بايقادىم. مولشىلىق پەن ىرىس- بەرەكە ىنتىماعى جاراسقان ەلدەن ەشقايدا كەتپەيتىنىن دالەلدەپ جاتۋدىڭ ءوزى ارتىق. ولاي بولسا، قازاقستان - ءوزىنىڭ بارلىق يگىلىكتەرىنىڭ باستاۋىن بەيبىتشىلىك پەن تاتۋلىقتان الىپ وتىرعانىن تۇسىنەتىن مەملەكەت. پرەزيدەنت نۇرسۇلتان نازاربايەۆ قانداي جيىندا بولسىن ءوز ءسوزىن بىرلىك پەن ىنتىماققا شاقىرۋدان باستايدى جانە سول سوزدەرىمەن اياقتايدى. بەيبىتشىلىك پەن تاتۋلىقتى بارىنەن جوعارى قوياتىن جانە تىنىشتىقتىڭ ورنىعۋىنا بار كۇش-جىگەرىن جۇمسايتىن پرەزيدەنتى بار ەل ەشكىمنەن كەم بولماسى انىق.
قازاقستاندى جارقىن بولاشاق كۇتىپ تۇر. ونىڭ ىرگەلى ەل، ۇلگىلى مەملەكەت بولۋىنا شىن جۇرەكتەن تىلەكتەسپىن. تاۋەلسىزدىك تۋىن جەلبىرەتكەن قازاقستاننىڭ ءاربىر باسقان قادامى قايىرلى بولعاي»، - دەپ جازىلعان «ەگەمەن قازاقستان» گازەتىندە.
