جازۋشى دۋلات يسابەكوۆ ش. ايتماتوۆ اتىنداعى حالىقارالىق سىيلىقتىڭ لاۋرەاتى اتاندى

الماتى. قازاقپارات- قازاقستانىڭ بەلگىلى جازۋشىسى، دراماتۋرگ دۋلات يسابەكوۆ شىڭعىس ايتماتوۆ اتىنداعى حالىقارالىق سىيلىقتىڭ لاۋرەاتى اتاندى.

ماراپاتتاۋ ءراسىمى وسىمەن ءتورتىنشى رەت لوندون قالاسىندا ءوتتى. ءبىر ايتا كەتەتىن جايت، بۇل جولى سالتاناتتى شارا تۇڭعىش رەت ەلدىڭ پارلامەنتى عيماراتىندا بولدى.

«مەن باقىتتىمىن. ويتكەنى، بۇل حالىقارالىق سىيلىقتى قازاقستاننىڭ تاۋەلسىزدىگى كۇنى قارساڭىندا الىپ تۇرمىن» - دەدى جازۋشى.

د. يسابەكوۆكە بۇل سىيلىق ءوزىنىڭ «وكپەك جولاۋشى» اتتى پەساسىنىڭ لوندون تەاترىندا ساحنالانعانى جانە تۇڭعىش رەت اعىلشىن تىلىندە «گاۋھارتاس» اتتى اڭگىمەلەر مەن پوۆەستەر جيناعىنىڭ جارىق كورگەندىگى ءۇشىن بەرىلدى.

جوعارى ماراپاتقا يە بولعان جازۋشى ءوز سوزىندە قازاقستاننىڭ تاۋەلسىزدىك العاننان باستاپ، يادرولىق قارۋدان باس تارتقاندىعىن ءاردايىم ماقتان تۇتاتىندىعىن جەتكىزدى.

«ەلباسىنىڭ باستاماسىمەن قازاقستاندا بۇگىندە تىلدەردىڭ ءۇش بىرلىگى ساياساتى جۇرگىزىلەدى. ياعني قازاق، ورىس جانە اعىلشىن تىلدەرى وقىتىلادى. ال بۇل، حالقىمىزعا باسەكەگە قابىلەتتى، اشىق، تولەرانتتى بولۋعا مۇمكىندىك بەرەدى» - دەدى د. يسابەكوۆ.

سونىمەن قاتار، بيىل اتالمىش ماراپاتقا فرانسيالىق جازۋشى ءارى اۋدارماشى ليلي دەني دە يە بولدى. ول شىڭعىس ايتماتوۆتىڭ «قوش بول، گۇلسارى»، «اق كەمە» پوۆەستەرى مەن «كاسساندرا تاڭباسى» رومانىن فرانسۋز تىلىنە اۋدارعان.

اتالمىش شارا بارونەسسا مەرال حۋسەين- ەچەنىڭ باستاماسىمەن جانە لوردتار پالاتاسىنىڭ قولداۋىمەن ۇيىمداستىرىلدى. ال «سامۇرىق-قازىنا» ۇلتتىق ءال-اۋقات قورى دەمەۋشىلىك كورسەتتى. ايتا كەتەلىك، «سامۇرىق-قازىنا» ۇلتتىق ءال-اۋقات قورى شىڭعىس ايتماتوۆ اتىنداعى حالىقارالىق سىيلىققا 2012-جىلدان بەرى قولداۋ كورسەتىپ كەلەدى.

اۆتور: جاپپاربەرگەن ايبوتا