تاۋەلسىزدىك تولعاۋى: قازاقستان الەمدە كوشباسشى ەلدەردىڭ بىرىنە اينالدى

استانا. قازاقپارات - ق ر مادەنيەت جانە سپورت مينيسترى ارىستانبەك مۇحامەدي ۇلى تاۋەلسىزدىك كۇنى مەرەكەسىنە وراي ءوزىنىڭ جۇرەكجاردى تىلەگىن ءبىلدىردى.

«قازاقستاننىڭ ەڭ ۇلىق مەرەكەسى، ارينە ول - تاۋەلسىزدىك كۇنى. بارىمىزگە ورتاق مەيرام. 23 جىلدىڭ ىشىندە قازاقستان اياعىن نىق باسقان ەلگە اينالىپ قانا قويعان جوق، ول الەمدىك قاۋىمداستىقتىڭ كوشباسشى مەملەكەتتەرىنىڭ بىرىنە، ال استانا گەوساياساتتىڭ ورتالىق نۇكتەسىنە اينالدى. الەمدىك دەڭگەيدەگى كوپتەگەن ساياسي شەشىمدەر بىزدىڭ ەلوردامىزدا قابىلدانادى. ءبىز وسىناۋ قۇرمەتكە لايىقتى ەلمىز. ەڭ باستىسى، ءبىز بولاشاققا سەنىممەن قارايمىز. قازاقستاندا جاستارىمىزدىڭ باقىتتى عۇمىر كەشۋىنە بارلىق جاعدايلار جاسالۋدا»، - دەدى ا. مۇحامەدي ۇلى استانادا روي دجونس جانە ولەگ ماسكايەۆپەن بولعان كەزدەسۋىندە.

ونىڭ ايتۋىنشا، ەلباسى سپورتشىلارعا ۇلكەن قولداۋ كورسەتىپ، ەلدەگى سپورتتىڭ دامۋىنا بارلىق جاعدايلار جاساۋعا باعالانباس ۇلەس قوسۋدا. «كەشە عانا قازاقستان پرەزيدەنتى ەلدەگى ۇلكەن جەتىستىكتەرگە قول جەتكىزگەن سپورتشىلاردى ماراپاتتادى. بۇل سپورتقا دەگەن وڭ كوزقاراستىڭ بەلگىسى. قازاقستان الەمدە سپورت دەرجاۆاسىنا اينالدى»، - دەپ اتاپ ءوتتى مينيستر.

اۆتور: جاسۇلان جولدىبايەۆ