قازاقستاندىقتار تاۋەلسىزدىك كۇنىن اتاپ وتۋدە

استانا. قازاقپارات - بۇگىن - قازاقستان رەسپۋبليكاسىنىڭ تاۋەلسىزدىك كۇنى، ەلىمىزدىڭ باستى مەملەكەتتىك مەرەكەلەرىنىڭ ءبىرى. تاريحى تەرەڭدە جاتقان ەلدىڭ جاڭا زاماندا ءوز الدىنا قايتا ەگەمەندى ەل بولعان كۇنى.

16 - جەلتوقسان كۇنى قازاقستاننىڭ بارلىق جەرلەرىندە مەرەكەلىك مادەني ويىن- ساۋىق ءىس- شارالارى ۇيىمداستىرىلادى. كەشكە قاراي ۇلكەن ورتالىقتاردىڭ اسپانى وتشاشۋمەن كومكەرىلەدى. تاۋەلسىزدىك تەك قازاقستان تۇرعىندارى ءۇشىن ەمەس، سونىمەن بىرگە، شەتەلدەردەگى قازاق حالقىنىڭ وكىلدەرى ءۇشىن دە ماڭىزى زور مەرەكە.

1991 - جىلى  ك س ر و   ىدىراپ، وداقتىڭ قۇرامىنداعى ەلدەر ءوز الدارىنا جەكە مەملەكەت بولىپ جاتتى.  سولاردىڭ قاتارىندا قازاقستان دا بولدى. 1991 - جىلى 16-   جەلتوقساندا قازاقستاننىڭ جوعارعى كەڭەسى «تاۋەلسىزدىك پەن مەملەكەتتىڭ ەگەمەندىگى تۋرالى» زاڭدى قابىلدادى. بۇل زاڭ 1990 - جىلى 25  -  قازاندا قابىلدانعان قازاقستاننىڭ ەگەمەندىگى تۋرالى دەكلاراتسيامەن بىرگە قازاق ەلىنىڭ  مەرەيىن نىعايتا ءتۇستى.

قازاقستاننىڭ تاۋەلسىزدىگىن رەسمي تۇردە ەڭ العاش بولىپ مۇحيتتىڭ ارعى جاعىندا جاتقان امەريكا قۇراما شتاتتارى ،  ەكىنشى بولىپ ايداھارداي ايبارلى قىتاي، سونان سوڭ  ۇلى بريتانيا مويىندادى.  بۇدان ءارى موڭعوليا، فرانسيا، جاپونيا، وڭتۇستىك كورەيا جانە يران يسلام مەملەكەتى  تانىدى.   وسىلايشا الەمدىك ساياسات ارەناسىندا قازاقستان دەگەن   جاڭا مەملەكەت پايدا بولدى.  نەبارى  بىرنەشە اپتانىڭ ىشىندە الەمنىڭ كوپتەگەن بەدەلدى ەلدەرى قازاق ەلىنىڭ تاۋەلسىزدىگىن  قۋاتتاپ ، ديپلوماتيالىق قاتىناستار باستالدى.

 تاۋەلسىزدىك جىلدارىندا قازاقستان تورتكۇل دۇنيەگە تانىمال بولىپ، عاسىرلارعا تەڭ جولدان ءوتتى. قازاقستاننىڭ باستامالارى بۇگىندە بۇكىل الەمگە تانىمال. ەلىمىز الىس- جاقىن جۇرتتارمەن ارالاس- قۇرالاس بايلانىستا، ستراتەگيالىق ارىپتەستىكتە ورتالىق ازيا وڭىرىندەگى تۇراقتىلىقتىڭ نەگىزى بولىپ كەلەدى.

«بىرلىكتى ساقتاۋ جانە نىعايتۋ - ەڭ يگى ءىس. 21 - عاسىردا تەك بىرلىگى بەكەم، ەڭبەگىنەن راحات تاپقان، ازاماتتارى تاتۋ ەل عانا باقىتتى ءومىر سۇرەدى. بىزدەر، قازاقستاندىقتار ونى جۇرەگىمىزبەن سەزىندىك. تاۋەلسىزدىك جىلدارى ءبىز رۋحاني تۇرعىدان شىنىعىپ، شىڭدالدىق»، - دەدى قازاقستان پرەزيدەنتى نۇرسۇلتان نازاربايەۆ كەشە تاۋەلسىزدىك كۇنىنە وراي استانادا وتكەن سالتاناتتى جينالىستا سويلەگەن سوزىندە.

مەملەكەت باسشىسى ماڭگىلىك ەل يدەياسى مىزعىماس تۇراقتىلىقتىڭ سيمۆولى بولا وتىرىپ، ەرتەڭگى كۇنگە جول سىلتەيتىن، بولاشاققا سەنىمدى بىلدىرەتىن يدەيا ەكەنىنە نازار اۋداردى.

 ەلباسىنىڭ «نۇرلى جول -  بولاشاققا باستار جول» اتتى قازاقستان حالقىنا بيىلعى جولداۋىندا ەلىمىز دامۋىنىڭ 2050 - جىلعا دەيىنگى جارقىن دامۋ بولاشاعى ايقىن كورسەتىلگەن.