ەلباسى ءوزىنىڭ «تاۋەلسىزدىك تولعاۋىن» جاريالادى - فوتو
«حالقىمىزدىڭ قاستەرلى تاۋەلسىزدىگى مەن ماڭگىلىك ەلىمىزدىڭ بولاشاعى مەنى ۇنەمى تولعاندىرادى. «تاۋەلسىزدىكتىڭ ومىرلىك فيلوسوفياسى قانداي بولۋى كەرەك؟» دەگەن ساۋالدى مەن وزىمە ءسات سايىن قويىپ وتىرامىن. وسى جايىنداعى وي ورامدارىن قاعازعا ءتۇسىرىپ «تاۋەلسىزدىك تولعاۋى» دەپ اتاعىم كەلدى. ول ازات ەلىمىزدىڭ كۇللى ازاماتتارىنا، جالىندى جاستارعا بۇگىنگى بۋىننىڭ ەرەن ىستەرىن لايقىتى جالعاستىرىپ، ەرتەڭگى ۇرپاققا ارنالادى»، - دەي كەلە سول تولعاۋىن دا جاريالادى.
«زامان اعىمى ءبىزدى قازاقستان رەسپۋبليكاسى تۇڭعىش رەت تاۋەلسىز ەل رەتىندە الەمگە ايگىلەنگەن تاريحي داتا - 1991 - جىلدىڭ 16 - جەلتوقسانىنان كۇن سايىن، ساعات سايىن الىستاتىپ بارادى. ءبىز جىل وتكەن سايىن سول ءبىر تاريحي تاڭداۋدىڭ سارقىلماس قۇدىرەتىن جان جۇرەگىمىزبەن تۇسىنەمىز. ول - ەگەمەن مەملەكەتتە بەيبىتشىلىك پەن كەلىسىمدە، ءوزارا سەنىمدە ازات ءومىر ءسۇرۋ تاڭداۋى. ول تۋعان جەرىمىزدىڭ قازىناسى مەن قازبا بايلىعىنا دەربەس يەلىك ەتىپ، بارشا قوعامنىڭ يگىلىگى ءۇشىن ءوز قالاۋىمىزبەن جۇمساۋ تاڭداۋى. ول - ءوز تاعدىرىمىزدى ءوزىمىز ايقىنداۋ، بولاشاعىمىزدى ءوز قولىمىزبەن جاساۋ تاڭداۋى. ءبىزدىڭ جاڭا قازاقستانىمىز جارىق جۇلدىز بولىپ دۇنيەگە كەلدى. بارشامىزدى تاۋەلسىزدىكتىڭ ۇلى رۋحى جەبەيدى، بىرىكتىرەدى، بويىمىزعا قۋات بەرىپ، سەنىمىمىزدى نىعايتادى»، - دەپ تولعايدى ەلباسى.
بۇدان بولەك، ەلباسى تاۋەلسىزدىك - سان بۋىن بابالاردىڭ قاسيەتتى جەرىمىزدىڭ ءاربىر قادامىن قورعاۋ ءۇشىن توگىلگەن ولشەۋسىز قانى مەن تەرىنىڭ وتەۋى ەكەنىن، تاۋەلسىزدىك كەشەگى باتىر بابالار وسيەت ەتكەنىندەي، قازاقستاندى قاسىق قانى قالعانشا قورعاۋ جونىندەگى ءاربىر ازاماتتىڭ قايسار شەشىمى ەكەنىن دە اتاپ ءوتتى.
«ءبىز جۇرگىزىپ وتىرعان سىرتقى جانە ىشكى ساياسات - حالىقتىڭ دانالىعى. قازاقستاندى وركەندەتۋ جولىنداعى كۇللى جاۋاپتى شەشىمدەردىڭ دانالىعى. حالقىمىزدىڭ اسقاق ابىرويىنىڭ، قوناقجايلىلىعى مەن كەڭ پەيىلىنىڭ دانالىعى»، - دەپ تولعانادى ەلباسى.
بۇدان سوڭ، نۇرسۇلتان ءابىش ۇلى تاۋەلسىزدىك دەگەنىمىز - جالپىعا ورتاق ەڭبەك ەكەنىن، عىلىم قۋىپ، ءبىلىم ىزدەگەن وقۋشىلار مەن ستۋدەنتتەر ەڭبەگى، ەلىمىزدىڭ ۇلتتىق بايلىعىن ەسەلەي تۇسەتىن بارشا ماماندىق يەلەرىنىڭ ەڭبەگى ەكەنىن ەسكە سالادى. ءاربىر جاس بۋىننىڭ جۇرەگىنە وتانعا دەگەن شەكسىز سۇيىسپەنشىلىك دارىتاتىن قازاقستاندىقتاردىڭ ەڭبەگى ەكەنىن دە العا تارتادى، ەلباسى.
«ونىڭ كوكجيەگىن جاھاندىق دەڭگەيگە جايعان سان قىرلى مادەنيەتى بار. ونىڭ عىلىمعا، يننوۆاتسيالار مەن پروگرەسكە ءاردايىم ايقارا اشىق ەسىگى بار. ونىڭ كوزدەگەن مەجەلەرىنە قالايدا جەتەتىن ماقساتكەرلىگى بار. ماڭگىلىك ەل - تاۋەلسىزدىكتىڭ ومىرلىك فيلوسوفياسى. بۇل قاعيدالاردى مۇلتىكسىز ساقتاي وتىرىپ، ءبىز وتانىمىزدىڭ كوك بايراعىن نىق ۇستايمىز، ونى قازاقستان دامۋىنىڭ جاڭا بيىكتەرىنە دە اسقاقتاتا جەلبىرەتەمىز. بۇل ءبىزدىڭ ماڭگىلىك ۇستانىمىمىز» ، - دەپ تولعايدى ەلباسى.
اۆتور: قانات مامەتقازى ۇلى
