ن. نازاربايەۆ: داعدارىستار وتەدى، كەتەدى، ال ەل تاۋەلسىزدىگى، ۇلت مۇراتى، ۇرپاق بولاشاعى عۇمىرلىق - فوتو

استانا. قازاقپارات - داعدارىستار وتەدى، كەتەدى، ال ەل تاۋەلسىزدىگى، ۇلت مۇراتى، ۇرپاق بولاشاعى سەكىلدى ۇلى قۇندىلىقتار عانا عۇمىرلىق. بۇگىن استانادا قازاقستان رەسپۋبليكاسىنىڭ تاۋەلسىزدىك كۇنىنە ارنالعان سالتاناتتى جيىندا ق ر پرەزيدەنتى نۇرسۇلتان نازاربايەۆ وسىلاي مالىمدەدى.

 «نۇرلى جول» - بۇل بارلىق وڭىرلەر ءۇشىن جاڭا مۇمكىندىكتەر. مەملەكەتىمىزدىڭ جۇرەگى استانادان تارايتىن جولدار ادام مەن تاۋاردى عانا ەمەس، ەلوردانىڭ جاسامپاز رۋحىن كۇللى ەلىمىزگە جانە دۇنيەگە تاراتاتىن كۇرەتامىر. داعدارىستار وتەدى، كەتەدى، ال ەل تاۋەلسىزدىگى، ۇلت مۇراتى، ۇرپاق بولاشاعى سەكىلدى ۇلى قۇندىلىقتار عانا عۇمىرلىق. «نۇرلى جول» ءبىزدىڭ ەلدىك قۇندىلىقتارىمىزدىڭ قادىرىنە جەتكىزەتىن ماڭگى جول»، - دەدى نۇرسۇلتان نازاربايەۆ.

سونىمەن قاتار، ەلباسى «نۇرلى جول» جاڭا ەكونوميكالىق ساياساتتى ۇلتتىق قورسىز جۇزەگە اسىرۋ مۇمكىن ەمەستىگىن ايتا كەلە، وسى قوردىڭ توڭىرەگىندە دە ءتۇرلى اڭگىمەلەر بولعانىن ەسكە سالدى.

 «13 جىل بۇرىن ءبىز وسى قوردى قاۋىپسىزدىكتىڭ بازالىق تەتىگى رەتىندە قۇرعان بولاتىنبىز. قور 2007-2009 - جىلدارداعى جاھاندىق داعدارىسقا قارسى كۇرەستە دە ماڭىزدى ءرول اتقاردى. ۇلتتىق قور الەمدىك نارىقتا باعا قۇلدىراي باستاعاندا ەكونوميكانى قۇتقارادى، ءبىز ينفراقۇرىلىمعا، وندىرىسكە قاراجات قۇيامىز، بيزنەسكە، ەڭ الدىمەن شاعىن جانە ورتا كاسىپكەرلىككە كومەكتەسەمىز»، - دەدى ن. نازاربايەۆ. بۇل رەتتە ەلباسى ۇلتتىق قور حالىقتىڭ يگىلىگىنە پايدالانعاننان كەمىمەگەنىن، كەرىسىنشە سوڭعى بەس جىلدا ونىڭ ۆاليۋتالىق قورى 3,8 پايىزعا ارتقانىن مالىمدەدى.

«ۇلانعايىر جەرى بار، ۇلى مۇراتى بار، ەلى بار، بابالارى جازعان ۇلى تاريحى مەن ۇرپاعى بار، كوز تىككەن ۇلى بولاشاعى بار مەنىڭ حالقىم - ۇلى حالىق. سول حالىقتىڭ تۇڭعىش باسشىسى بولۋ باقىتى ماعان تيگەنىنە ءتاۋبا دەيمىن» ، - دەدى ن. نازاربايەۆ.

 بۇل رەتتە ەلباسى تاۋەلسىزدىكتى الۋ ءۇشىن قانداي قاجىر- قايرات كەرەك بولسا، ونى باياندى ەتىپ ۇستاپ وتىرۋ ءۇشىن ودان دا زور قاجىر- قايرات كەرەك ەكەنىن ەسكە سالدى.

«تابىسقا توقمەيىلسىمەي، كەيىنگى ۇرپاققا كەمەل قازاقستاندى تابىستاۋ ءبىزدىڭ ۇرپاقتىڭ پارىزى. 21- عاسىردىڭ سىن- قاتەرىنەن توتەپ بەرىپ، ەڭ دامىعان ەلدەردىڭ بىرىنە اينالۋ - ءبىزدىڭ ورتاق جاۋاپكەرشىلىگىمىز. ءبىز حالقىمىزدىڭ قاھارماندىق تاريحىن جاسامپازدىق تاريحىنا ۇلاستىردىق. الەمدەگى ەڭ ۇلكەن ەلۋ ەلدىڭ ساپىنا ەنىپ، قازىرگى كۇنى ەڭ قۋاتتى وتىز ەلمەن يىق تىرەسۋگە بەت الدىق. رۋحى بيىك، ەڭسەسى تىك، ەڭبەگى ەرەن، بىرلىگى مىعىم ماڭىلىك ەلدىڭ مارتەبەسى اسقاق بولۋى ءۇشىن بىزدە ءبارى دە بار. ەندەشە، باردى باعالاپ، دامىتا بىلەيىك»، - دەدى مەملەكەت باسشىسى.

اۆتور: قانات مامەتقازى ۇلى