تاۋەلسىزدىك كۇنى - ءوز بولاشاعىمىزدى ءوزىمىز ايقىنداۋعا قولىمىز جەتكەن ۇلى كۇن - ن. نازاربايەۆ

استانا. قازاقپارات - تاۋەلسىزدىك كۇنى - ءوز بولاشاعىمىزدى ءوزىمىز ايقىنداۋعا قولىمىز جەتكەن ۇلى كۇن. بۇگىن استانادا قازاقستان رەسپۋبليكاسىنىڭ تاۋەلسىزدىك كۇنىنە ارنالعان سالتاناتتى جيىندا ق ر پرەزيدەنتى نۇرسۇلتان نازاربايەۆ وسىلاي مالىمدەدى.

 ەڭ الدىمەن ەلباسى بارشا قازاقستاندىقتاردى ايتۋلى مەرەكەمەن قۇتتىقتاپ: «ەلىمىزدىڭ تۇمارى، ەلدىگىمىزدىڭ شىنارى بولعان - تاۋەلسىزدىك كۇنى قۇتتى بولسىن!»، - دەپ اتاپ ءوتتى.

 «وسىدان 23 جىل بۇرىن ادامزات كوگىندە جارىق جۇلدىز پايدا بولدى. ول - كوك بايراعىن شالقىتىپ، الەم تاريحىنا ءمورىن باسقان تاۋەلسىز قازاقستان ەدى. عاسىرلار بويعى حالقىمىزدىڭ ارمانى 1991 - جىلى 16 - جەلتوقساندا، بۇگىنگى بۋىننىڭ تاريحي تاڭداۋىنا اينالدى. بۇل كۇن ءوز تاعدىرىمىزعا ءوزىمىز قوجالىق ەتىپ، ءوز بولاشاعىمىزدى ءوزىمىز ايقىنداۋعا قولىمىز جەتكەن ۇلى كۇن بولدى»، - دەدى نۇرسۇلتان نازاربايەۆ سالتاناتتى جيىندى اشا وتىرىپ.

بۇدان بولەك، ەلباسى تاۋەلسىزدىك كۇنى تاريحي ادىلەت سالتانات قۇرىپ، ازاتتىق ءۇشىن توگىلگەن ولشەۋسىز قاننىڭ وتەۋى قايتقان ۇمىتىلماس كۇن، سان ءداۋىر وتسە دە ۇرپاقتارىمىز ۇلىقتاپ وتىراتىن كۇن ەكەنىن ەسكە سالدى.

«التاي مەن اتىراۋدىڭ، سىرداريا مەن ەسىلدىڭ اراسىنداعى ەلىمىزدىڭ جىلناماسى التىن ارىپپەن جازىلعان ارداقتى كۇن. جەر بەتىندە مىڭداعان ۇلىستار مەن ۇلتتار بار، ءبىز دەربەس مەملەكەت قۇرۋ باقىتىنا يە بولعان 193 ۇلتتىڭ ءبىرىمىز. ادام باسىنا باقىتتىڭ قونۋى ءبىر بولەك، سول باقىتتى باعالاي ءبىلۋدىڭ ءجونى - ءبىر بولەك. تاۋەلسىزدىك العان ەلدەردىڭ بارلىعىندا تۇراقتىلىق پەن تاتۋلىق ۇيىپ، دامۋدىڭ داڭعىلىنا تۇسە قويعان جوق. تاۋەلسىزدىك تاريحتىڭ سىيى نەمەسە بۇگىنگىنىڭ مەنشىگى ەمەس، ول وتكەن بابالاردىڭ الدىنداعى قاسيەتتى بورىش، كەلەشەك ۇرپاقتىڭ الدىنداعى زور جاۋاپكەرشىلىگىمىز بولىپ تابىلادى. ءبىز تاۋەلسىزدىگىمىزدى ءتاۋ ەتىپ، ءتاۋبا ەتىپ تاۋەكەلمەن بولاشاققا بەت تۇزەپ كەلە جاتقان حالىقپىز»، - دەدى ەلباسى نۇرسۇلتان نازاربايەۆ.

اۆتور: قانات مامەتقازى ۇلى