قانات يسلام: گەننادي ەكەۋمىزدى قارسى قويۋ اعايىندى كليچكولاردى ءبىر-بىرىمەن توبەلەستىرگەنمەن بىردەي
ەستەرىڭىزدە بولسا، جاقىندا ب ا ق وكىلدەرى قانات يسلاممەن گەننادي گولوۆكين جۇدىرىقتاسۋى مۇمكىن ەكەنىن جارىسا جازىپ، قىزۋ تالقىعا سالعان بولاتىن.
بۇگىن قانات بۇل پىكىردى جوققا شىعاردى.
«ءار بوكسشى ءوزىنىڭ باپكەرىنە «التىن» ەكەنى انىق! مەنىڭ باپكەرىم نەلسونعا (نەلسون لوپەس - اۆت.) بىرەۋلەر «قاناتتى گەنناديمەن جۇدىرىقتاستىرعىڭ كەلمەي مە؟» دەگەن باعىتتا حاتتار جىبەرگەن. ونى كىم جىبەرگەنى بەلگىسىز. ال وعان باپكەرىم: «ءبارى دە مۇمكىن» دەپ جاۋاپ بەرگەن. مىنە، بۇل اڭگىمە وسىدان باستالعان. گەنا - مىقتى بوكسشى. ول - ءبىزدىڭ الدىمىزداعى تۋ. الدىمىزداعى تۋ قۇلاماسىن، كاسىپقوي بوكسقا كەش قوسىلعان بىزدەر دە الدىمىزداعى تۋدىڭ قۇلاماعانىن قالامايمىز»، - دەپ اتاپ ءوتتى قانات يسلام.
سونىمەن قاتار قانات گەنناديمەن وتە جاقسى قارىم-قاتىناستا ەكەنىن، ەكەۋى ءبىر-ءبىرىن اۋەسقوي بوكستا جۇرگەننەن بەرى تانيتىنىن، تالاي جاتتىعۋ زالدارىندا بىرگە جاتتىققانىن، قازىر دە جاقسى ارالاسىپ تۇراتىنىن جاسىرمادى.
«مەن گەنناديدى سپورتشى رەتىندە دە، ازامات رەتىندە دە جاقسى سىيلايمىن. ءبىز، كەزىندە گەنا، باقتيار ارتايەۆ، باقىت سارسەكبايەۆتار ءبارىمىز ءبىر سالماقتىڭ بوكسشىلارى بولدىق. شەتتە جۇرسەم دە قازاقستانعا ءجيى كەلىپ ءجۇردىم. قازاقستاندىق باپكەرلەردەن دە كوپ ءتالىم الدىم. ەلىمىزدەگى بارلىق بوكسشىلاردى جاقسى بىلەمىن. بوكستاعى ءوز زامانداستارىممەن ءجيى قابارلاسىپ، ارالاسىپ تۇرامىن. ءبىراق، اۋەسقوي بوكستا گەنامەن شارشى الاڭدا كەزدەسىپ كورگەن جوقپىن. كاسىپقوي بوكستا دا كەزدەسپەيمىز. سەبەبى، گەنا ەكەۋىمىز دە ءبىر ەلدىڭ، قازاق توپىراعىنىڭ نامىسىن قورعاپ ءجۇرمىز. ال ءبىزدى ءبىر-بىرىمىزگە قارسى قويۋ اعايىندى كليچكولاردى ءبىر- بىرىمەن توبەلەستىرگەنمەن بىردەي. سوندىقتان، بۇل مۇمكىن ەمەس»، - دەپ وسى كۇنگە دەيىنگى الىپقاشپا اڭگىمەلەرگە نۇكتە قويدى.
كۇنسۇلتان وتارباي
