الەمدىك بايقاۋدا باس جۇلدە العان ءاننىڭ ءسوزى سىنعا ۇشىرادى
باسىلىمنىڭ پىكىرىنشە، «بايقاۋعا ءان تاڭداعاندا سوزىنە ەمەس، اۋەنىنە كوبىرەك كوڭىل بولگەنى بىردەن بايقالادى. بىرنەشە تىلگە اۋدارىلعان ماتىندە قاتەدەن كوز سۇرىنەدى. ۇيقاس ءۇشىن نەمەسە بۋىن سانىن جەتكىزۋ ءۇشىن ارتىق ءسوزدى كوپ قولدانعان سياقتى».
مىسالى: «تاراۋ، تاراۋ تاريح بوپ،
سويلەدى سوناۋ عاسىردان بابالارىم.
قول سوزىپ اسپانعا، اينالىپ داستانعا،
ەستىلگەندەي ماعان»، - دەگەن جولداردا «اسپانعا قول سوزعان» كىم ەكەنى بەلگىسىز: بابالار ما؟ الدە ورىنداۋشى ما؟ مۇمكىن تاريح شىعار؟» - دەپ جازادى گازەت.
تاعى ءبىر مىسال:
«سەزەم، بىلەم، كورەمىن ءبارىن دە،
بۇرىن-سوڭدى بۇنى قالاي بايقامادىم؟
جىرىم، سىرىم، قۇبىلعان ءانىمدى
قايتا-قايتا تاڭىرقادىم، قايتالادىم».
بەدەلدى بايقاۋداعى جەڭىمپاز ءاننىڭ ءسوزىن بۇعان دەيىن كەيبىر اقىندار الەۋمەتتىك جەلىلەردە دە سىناعان ەدى. ال گازەت جۋرناليستەرى «نەنى ءبىلىپ، نەنى سەزىپ، نەنى كورگەنىن ءانشى مەن ءماتىنىن جازعان اقىننان باسقا ەشكىمنىڭ تۇسىنبەگەنىنە ءباس تىگە الامىز" دەگەن سىن ايتادى.
«تاريح بەتىندە «ءىزىن قالدىراتىن» وسى ءبىر ءان سوزگە توقتاعان حالىقتىڭ ونەر جادىندا ساقتالۋعا لايىقتى ما؟» - دەپ ساۋال تاستايدى باسىلىم.
بۇل ولەڭدى ايتىسكەر اقىن رينات زايىتوۆتىڭ جازعانىن ايتا كەتۋ كەرەك. ال ءانشى جانار دوعالوۆا بۇل جونىندە: «كوبىنەسە اۋەندى ءوزىم جازامىن. ال ءسوزى اۋەنمەن قاتار كەلەدى. سودان كەيىن اقىندارعا كورسەتىپ، بىرگە اقىلداسىپ وتىرىپ، تولىقتىرامىز، وڭدەيمىز. ءاننىڭ مۋزىكاسى مەن ءماتىنى 50/50 بولۋى كەرەك، ياعني تەڭ دارەجەدە. ءماتىننىڭ كوركەم ءارى جەڭىل، سونداي-اق ماعىنالى بولۋىنا كوپ ءمان بەرەمىن. ماسەلەن، Turkvizyon ءان بايقاۋىندا ورىنداعان «ءىزىن كورەم» ءانىنىڭ ءماتىنىن اقىن رينات زايىتوۆپەن بىرلەسىپ جازدىق. بۇل ءاندى كوپشىلىك ماقتادى، جاقسى قابىلدادى. ءساتتى شىققان دۇنيە بولدى»، - دەگەن پىكىر بىلدىرگەن.
