ش ى ۇ جالپى ازيالىق ءال-اۋقات قورى ىسپەتتى - ن. نازاربايەۆ

استانا. قازاقپارات - ەلباسى ش ى ۇ-عا مۇشە مەملەكەتتەردىڭ ۇكىمەت باسشىلارىن قابىلدادى، دەپ حابارلادى اقوردانىڭ باسپا ءسوز قىزمەتىنەن.

كەزدەسۋگە ق ح ر مەملەكەتتىك كەڭەسىنىڭ پرەمەرى لي كىشياڭ، پرەمەر-مينيسترلەر: قىرعىز رەسپۋبليكاسىنان - جوومارت وتاربايەۆ، رەسەي فەدەراتسياسىنان - دميتري مەدۆەديەۆ، تاجىكستان رەسپۋبليكاسىنان - كوحير راسۋلزودا جانە وزبەكستان پرەمەر-ءمينيسترىنىڭ ءبىرىنشى ورىنباسارى - قارجى ءمينيسترى رۋستام ازيموۆ، ش ى ۇ باس حاتشىسى دميتري مەزەنتسيەۆ، ش ى ۇ لاڭكەستىككە قارسى وڭىرلىك ورتالىعىنىڭ اتقارۋشى كوميتەتىنىڭ ديرەكتورى سينفەن چجان قاتىستى.

قازاقستان پرەزيدەنتى ش ى ۇ-عا مۇشە مەملەكەتتەردىڭ ۇكىمەت باسشىلارى وتىرىسىنىڭ تاۋەلسىزدىك كۇنى قارساڭىندا ءوتۋىنىڭ سيمۆولدىق ءمانى بار ەكەنىن، ويتكەنى ۇيىمنىڭ العاشقى وتىرىسى 2001-جىلى الماتىدا وتكەنىن ايتتى.

- ۇكىمەت باسشىلارىنىڭ وتىرىسى ءبىزدىڭ ەلدە وسىمەن ءۇشىنشى رەت ءوتىپ وتىر. ۇيىم ساياسي سالماق پەن ەكونوميكالىق قۋاتقا يە بولىپ كەلەدى. بۇگىندە ول بارشاعا كەڭىنەن تانىلدى. بۇل جولعى كەزدەسۋدىڭ ەرەكشە ءمانى بار، ءبىز وزىمىزدە «شانحاي رۋحى» بولۋى تيىستىگىن ءاردايىم ايتىپ ءجۇرمىز، - دەدى مەملەكەت باسشىسى.

نۇرسۇلتان نازاربايەۆ ش ى ۇ-عا مۇشە مەملەكەتتەردىڭ ۇكىمەت باسشىلارى كەڭەسىنىڭ ۋفاداعى وتىرىسىندا ۇيىمنىڭ 2025-جىلعا دەيىنگى دامۋ ستراتەگياسىن بەكىتۋ جوسپارلانىپ وتىرعانىنا نازار اۋداردى.

- وسىعان بايلانىستى ۇكىمەتتەرگە اۋقىمدى جۇمىس اتقارۋعا تۋرا كەلەدى. مەملەكەت باسشىلارىنىڭ سوڭعى كەزدەسۋىندە جاڭا مۇشەلەر قابىلداۋ تارتىبىنە قاتىستى قۇجاتتارعا قول قويىلعان بولاتىن. بۇل ماسەلەگە سىندارلى ءارى ءادىل كوزقاراس كەرەك، - دەدى قازاقستان پرەزيدەنتى.

مەملەكەت باسشىسى سونداي-اق، ش ى ۇ جالپى ازيالىق ءال-اۋقات قورى سەكىلدى ەكەنىن، وعان بارلىق مۇشە مەملەكەتتەر تولىق قاتىسۋى تيىستىگىن ايتتى.

- ۇيىم، ەڭ الدىمەن، تۇراقتىلىق پەن ەلدەرىمىزدىڭ اراسىندا اۋماقتىق داۋدىڭ بولماۋى ءۇشىن، سونداي-اق بۇگىنگى زاماننىڭ ءۇش قاتەرى - سەپاراتيزمگە، ەكسترەميزم مەن لاڭكەستىككە قارسى بىرلەسىپ كۇرەسۋ ءۇشىن جۇمىس ىستەيدى. بىزگە ازىق-تۇلىكتىك، ەكولوگيالىق جانە ەنەرگەتيكالىق قاۋىپسىزدىك ماسەلەلەرىن دە شەشۋ كەرەك. ش ى ۇ مەملەكەتتەرى ەنەرگيا تاسىمالداۋشىلار مەن ازىق-تۇلىككە دەگەن سۇرانىستى قامتاماسىز ەتۋ مۇمكىندىكتەرىنە يە. بىرلەسكەن جۇمىس ارقىلى سۋ تاپشىلىعى مەن وزگە رەسۋرستارعا قولجەتىمدىلىك ماسەلەلەرىن دە شەشۋگە بولادى، - دەدى نۇرسۇلتان نازاربايەۆ.

قازاقستان پرەزيدەنتى ءبىزدىڭ ەلىمىز ۇيىم قىزمەتىن ءارى قاراي كەڭەيتۋ ءۇشىن قاجەت بولاتىن ش ى ۇ دامۋ بانكىن قۇرۋ تۋرالى باستامانى قولدايتىنىنا توقتالدى.

سونىمەن قاتار، كولىك سالاسىنداعى ىنتىماقتاستىقتى دامىتۋ ش ى ۇ اياسىنداعى ىقپالداستىقتىڭ ماڭىزدى باعىتتارىنىڭ ءبىرى رەتىندە اتالدى. نۇرسۇلتان نازاربايەۆتىڭ ايتۋىنشا، قازاقستان وتاندىق ەكونوميكانى دامىتۋدى عانا ەمەس، بۇكىل وڭىردەگى ءوزارا ساۋدا مەن ىسكەرلىك بايلانىستاردى جانداندىرۋدى كوزدەيتىن ءبىرقاتار ماڭىزدى كولىك جوبالارىن ىسكە اسىراتىن بولادى.

- ءبىزدىڭ ەلىمىزدە «نۇرلى جول - بولاشاققا باستار جول» دەپ اتالاتىن جاڭا ەكونوميكالىق ساياسات جاريالاندى. سوعان سايكەس، ءبىز ينفراقۇرىلىمداردى دامىتۋعا باعىتتالعان مەملەكەتتىك ينۆەستيتسيالاردى جۇزەگە اسىرامىز. استانادان ەلدىڭ بارلىق وڭىرلەرىنە قاراي اۆتوكولىك جولدارى مەن تەمىرجولدار سالىنادى. ءبىز كاسپيدە ەكى تەڭىز پورتىن سالامىز، ونىڭ ءبىرى اۆتوموبيلدەر مەن تەمىرجول ۆاگوندارىن پاروممەن تاسىمالداۋعا ارنالعان. وسى جاڭا كولىكتىك مۇمكىندىكتەردىڭ ءبارىن ش ى ۇ-نىڭ بارلىق مۇشەلەرى پايدالاناتىن بولادى دەپ ويلايمىن، - دەدى قازاقستان پرەزيدەنتى.

سوڭىندا نۇرسۇلتان نازاربايەۆ ش ى ۇ-عا مۇشە مەملەكەتتەردىڭ ۇكىمەت باسشىلارىنىڭ جۇمىسىنا تابىس تىلەي وتىرىپ، قازاقستان ۇيىمدى نىعايتۋ ىسىنە ۇلەس قوسۋعا ءاردايىم دايىن ەكەنىن ايتتى.