پاۆلوداردا ءيىسشىل ءيت ۇرلانعان ديۆاندى تاۋىپ بەردى
قالالىق ىشكى ىستەر باسقارماسىنىڭ كەزەكشى بولىمىنە تۇرعىنداردىڭ ءبىرى حابارلاسىپ، پودەزدەن ديۆانى ءاپ-ساتتە ۇرلانعانىن ايتقان.
ەر ادام پاتەرىندە كوپ ورىن الىپ تۇرعان جيھازدى تۋىسقانىنا بەرىپ جىبەرمەك بولادى. ءسويتىپ، ونى ءتورتىنشى قاباتتان ءبىرىنشى قاباتقا اۋپىرىمدەپ تۇسىرەدى دە، شاقىرىپ قويعان كولىكتى قارسى الۋعا سىرتقا شىعىپ كەتەدى.
5-10 مينۋتتان سوڭ قايتىپ كەلسە، ديۆانى ورنىندا بولماي شىعادى. تۇرعىن پوليتسياعا حابارلاسۋعا ءماجبۇر بولادى. پودەزدەگى ديۆاننىڭ قايدا كەتكەنىن انىقتاۋ ءۇشىن كورشىلەردەن تۇسىنىكتەمە الىنادى، الايدا كورگەن- بىلگەن ادام تابىلمايدى.
سول كەزدە تەرگەۋ-جەدەل توبى كينولوگيالىق قىزمەتتىڭ ارنايى ۇيرەتىلگەن ءيتىن كومەككە شاقىرادى. شانەل ەسىمدى ءيت ديۆاننىڭ ەكىنشى قاباتتاعى پاتەرلەردىڭ بىرىندە ەكەنىن ءدال تابادى. قازىر بۇل دەرەك بويىنشا پوليتسەيلەر ءتيىستى شارا قولدانىپ جاتىر.
