قانات يسلام تاۋەلسىزدىك كۇنىن قالاي مەرەكەلەيتىنىن ايتتى - فوتو
«تاۋەلسىزدىك - ەلىمىزدىڭ ەڭ ۇلكەن ۇلىق مەرەكەسى. بارشا قازاقستاندىقتاردى وسى مەرەكەمەن قۇتتىقتايمىن» دەدى ول بۇگىن «قازاقپارات» حالىقارالىق اقپاراتتىق اگەنتتىگىندە قوناقتا بولعان كەزىندە.
«ءبىزدىڭ بۇگىنگى جەڭىسىمىز بەن جەتىستىگىمىز وسى تاۋەلسىزدىكتىڭ ارقاسى. تاۋەلسىز ەلىمىز بولماسا، ءبىزدىڭ ەرلىگىمىز بەن تابىسىمىز كىمگە كەرەك؟ مەملەكەتىمىزدىڭ بۇگىنگى بەرەكە-بىرلىگى جاراسقان وسى مامىراجاي كۇندەرى ۇزاعىنان بولسىن دەپ تىلەيىك. تاۋەلسىزدىك مەرەكەسى - پاتريوتتىق مەرەكە»، - دەپ اتاپ ءوتتى ول.
سونىمەن قاتار، «جەلتوقساننىڭ ەكپىنىمەن كەلگەن تاۋەلسىزدىكتىڭ ءبىز ءۇشىن الار ورنى قاشان دا بولەك. سوندىقتان دا «تولارساقتان ساز كەشكەن» باتىر بابالارىمىزدىڭ ءار جىلدا توگىلگەن قانىنىڭ، ۇلى مۇراتتار جولىندا قۇربان بولعان اسىل ازاماتتارىمىزدىڭ اسقاق ارماندارىنىڭ ارقاسىندا قول جەتكىزگەن تاۋەلسىزدىكتى ءبىز ءارقاشان ماقتان تۇتىپ، قاستەرلەي بىلۋگە ءتيىستىمىز. بىلە بىلسەك، بۇل - ءبىزدىڭ ازاماتتىق پارىزىمىز، ادامدىق بورىشىمىز»، - دەدى قانات يسلام.
«مەنىڭ وتباسىمدا تاۋەلسىزدىك كۇنى ۇلكەن توي بولادى. جاقسىلاپ تۋىس-تۋعان، اعايىن-دوستار جينالىپ، ۇلكەن داستارحان جاساپ، ارنايى اتاپ وتەمىز»، - دەدى بوكسشى.
سونداي-اق، قانات يسلام تالاي ۇلت پەن ۇلىستىڭ ورتاق مەكەنىنە اينالعان ۇلى دالادا ازات ەلدىڭ ازاماتى اتانعاننان اسقان باقىت جوق ەكەنىن ايتا كەلىپ، قازاقپارات ۇجىمىنا دا تابىستار تىلەدى.
«سىزدەر دە تاۋەلسىزدىكتىڭ تال بەسىگىندە تەربەلىپ، جازارلارىڭىز مول، وقىرماندارىڭىز كوپ بولسىن. بارلىق وتانداستارىمىزعا قىران قۇسى قالىقتاعان كوك اسپانىمىزدىڭ استىندا باياندى دا باقىتتى عۇمىر سىيلاسىن» دەپ اتاپ ءوتتى.
