قازاق ءتىلىن ونلاين رەجىمدە ۇيرەتەتىن موبيلدى قوسىمشا شىقتى
Soyle.kz موبيلدى قوسىمشاسى پايدالانۋشىلارعا مەملەكەتتىك ءتىلدى تەگىن، وزدەرىنە قولايلى ۋاقىتتا ءارى جىلدام ۇيرەنۋگە مۇمكىندىك بەرمەك.
موبيلدىك قوسىمشانى پايدالانۋ ناتيجەسىندە ءاربىر ادام ارنايى تىلدىك كۋرستارعا كەتەتىن التىن ۋاقىتىن ۇنەمدەي الادى.
Soyle.kz قوسىمشاسىن تەلەفونعا نەمەسە پلانشەتكە جۇكتەپ الىپ، مەملەكەتتىك ءتىلدى وزىڭىزگە ىڭعايلى ۋاقىتتا ۇيرەنۋگە بولادى.
«ءبىر جىل بۇرىن ءبىز Soyle.kz اتتى قازاق ءتىلىن ونلاين رەجىمدە وقىتاتىن تەگىن پورتال اشقان بولاتىنبىز. ءبىزدىڭ پورتالدى ءبىر جىلدىڭ ىشىندە الەمنىڭ ءار قيىرىنان 250 مىڭنان استام ادام پايدالانعان بولسا، بۇگىنگى تاڭدا پورتالىمىزدا تىركەلىپ، قازاق ءتىلىن كۇندەلىكتى ونلاين رەجىمدە ۇزبەي وقىپ جاتقانداردىڭ سانى 15 مىڭنان اسىپ، 16 مىڭعا جۋىقتاپ قالدى. بۇگىن ءبىز Soyle.kz پورتالىنىڭ موبيلدى قوسىمشاسىن جانە sozdik.soyle.kz تاقىرىپتىق سوزدىكتى تانىستىرامىز.
سونداي-اق «ەل بولام دەسەڭ، بەسىگىڭدى تۇزە» دەيدى عوي قازاق حالقى، سول سياقتى بۇلدىرشىندەرىمىزگە ارناپ ۇلكەن ينتەرنەت پورتال اشايىن دەپ وتىرمىز» - دەدى مەملەكەتتىك ءتىلدى دامىتۋ قورىنىڭ ديرەكتورى ازات شاۋەيەۆ ورتالىق كوممۋنيكاتسيالار قىزمەتىندە وتكەن شارادا.
قوسىمشاعا Soyle.kz پورتالىنىڭ بارلىق بولىمدەرى جانە دە 3500 گە جۋىق ءسوز بەن 700 دەن استام تىلدەسۋ ۇلگىلەرى تولىقتاي دىبىستالعان «تاقىرىپتىق سوزدىك» ماتەريالدارى ەنىپ وتىر. جيناقتالعان 50 تاقىرىپ كۇندەلىكتى ءومىردىڭ نەگىزگى سالالالارىن قامتيدى، بۇل ەستە ساقتاۋدا قيىندىق تۋدىراتىن سوزدەردى كەزەڭ- كەزەڭمەن مەڭگەرۋگە مۇمكىندىك بەرەدى.
قازىرگى ۋاقىتتا قوسىمشانى Android وس سمارتفوندارىنا جۇكتەپ الۋعا بولادى. 2015 - جىلى iOS پلاتفورماسىنا شىعۋ جوسپارلانىپ وتىر.
ايتا كەتەيىك، Soyle.kz قازاقستان رەسپۋبليكاسى تۇڭعىش پرەزيدەنتى - ەلباسى قورى، «سامۇرىق- قازىنا» ا ق جانە «Samsung Electronics» كومپانياسىنىڭ قولداۋىمەن اشىلعان قازاق ءتىلىن ونلاين رەجىمىندە تەگىن ۇيرەتەتىن تۇڭعىش ينتەرنەت پورتال.
Soyle.kz قازاقستان رەسپۋبليكاسىنىڭ پرەزيدەنتى ن. نازاربايەۆتىڭ مەملەكەتتىك ءتىلدىڭ قوعامداعى مارتەبەسىن ارتتىرۋ، دامىتۋ جانە قولدانىس اياسىن كەڭەيتۋ باعىتىنداعى تالاپ- مىندەتتەرىنە ساي ازىرلەنگەن وزىق IT جوبا.
ال بالالارعا ارنالعان «بالالارعا ارنالعان قازاق ءتىلى» - Bala.soyle.kz پورتالى - مەكتەپكە دەيىنگى بۇلدىرشىندەر مەن باستاۋىش سىنىپ وقۋشىلارىنا ارنالعان ديستانسيالىق وقىتىپ- ۇيرەتۋ جۇيەسى.
«ويىن - تاربيە قۇرالى، اقىل - ويدى دامىتادى، ءتىلدى ۇستارتادى، سوزدىك قوردى مولايتادى، ءومىردى تانىپ، سەزىمدى كەڭەيتەدى، تاربيەلەيدى. سوندىقتان دا ءبىز بالانى ويناتا وتىرىپ سويلەتۋگە، سۋرەتتەردى قاراپ، زاتتاردى سيپاتتاۋ، جۇمباق ەسەپتەردى شەشۋ، قۇراستىرۋ، تاقپاقتار جاتتاۋ ارقىلى ولاردىڭ قىزىعۋشىلىعىن ارتتىرۋعا تىرىستىق»، - دەيدى قور باسشىسى.
پورتالدا بالالار الىپبيمەن، اۋديو-سوزدىكتەر ارقىلى جاڭا سوزدەرمەن تانىسىپ، ساناۋدى ۇيرەنەدى. «ەرتەگىلەر»، «ساندىقشا»، «ويىندار» اتتى قوسىمشا بولىمدەردە بالالار قازاق تىلىندە مۋلتفيلمدەر كورىپ، ءان ايتىپ، ەرتەگى تىڭداپ، ساناماقتاردى ۇيرەنىپ، تاعى دا سان الۋان قىزىقتى ساباقتاردى تابا الادى.
اۆتور: جاسۇلان جولدىبايەۆ
