ءشامىل ءابىلتاي «نۇرلى جول» كۇي-تولعاۋىن شىعاردى

استانا. قازاقپارات - كۇيشى-كومپوزيتور ءشامىل ءابىلتاي جاڭا كۇيىن تاراز مەملەكەتتىك پەداگوگيكالىق ينستيتۋتىنىڭ ستۋدەنتتەرىنە ورىنداپ بەردى.

بۇل تۋرالى ينيستيتۋتتىڭ باسپا ءسوز قىزمەتى حابارلايدى.

16 - جەلتوقسان ق ر تاۋەلسىزدىك كۇنى قارساڭىندا تاراز مەملەكەتتىك پەداگوگيكالىق ينستيتۋتىندا قازاقستاننىڭ ەڭبەك سىڭىرگەن قايراتكەرى، كۇيشى-كومپوزيتور ءشامىل ابىلتايمەن كەزدەسۋ ءوتتى.

كەزدەسۋدە توكپە كۇي مەن شەرتپە كۇيدىڭ شەبەرى ءشامىل ءابىلتاي ءوز شىعارمالارىنىڭ تۋۋ تاريحىنا توقتالىپ، شەبەرلىك ساعاتىن وتكىزدى. سونداي-اق، كۇيشىنىڭ «قازاقستان- نۇرسۇلتان» كۇي-پورترەتىنە تۇسىرىلگەن بەينەبايانى ستۋدەنتتەرگە كورسەتىلدى.

«ءشامىل ءابىلتاي - كەشەگى قۇرمانعازى مەن تاتتىمبەتتىڭ، داۋلەتكەرەي مەن قازانعاپتىڭ بۇگىنگى كۇندەگى ءىزباسارى دەسەك اسىلىق ايتقاندىق ەمەس. ەلباسى نۇرسۇلتان نازاربايەۆ بيىلعى «نۇرلى جول - بولاشاققا باستار جول» اتتى جولداۋىندا اتاپ كورسەتكەندەي، كەلەسى جىلى قازاق حاندىعىنىڭ قۇرىلعانىنا 550 جىلدىعىن تويلاماقپىز.

سان عاسىرلار بەلەسىندە «مىڭ ءولىپ، مىڭ تىرىلگەن» قازاق حالقى ءۇشىن ايتۋلى مەرەكە قارساڭىندا كوپتەگەن يگىلىكتى ىستەر اتقارىلماق. مىنە، سونىڭ ءبىر پاراسى تاريحتىڭ سان تەزىنەن وتكەن ۇلتتىق مۋزىكاعا دا قاتىستى.

ولاي بولسا، بۇگىنگى كەشتىڭ ماڭىزى - ەرەكشە ەكەندىگى داۋسىز»، - دەيدى تاراز مەملەكەتتىك پەداگوگيكالىق ينستيتۋت رەكتورى داريا قوجامجاروۆا قۇتتىقتاۋ سوزىندە.

وقۋ ورنىنىڭ باسشىسى كۇيشى قوناققا قازاقى سالتپەن شاپان جاۋىپ، «تاراز مەملەكەتتىك پەداگوگيكالىق ينستيتۋتىنىڭ قۇرمەتتى پروفەسسورى» اتاعىن سالتاناتتى تۇردە تابىس ەتتى.

جاندار اسان

«تۇركىستان»