قازاقستان تەمىر جولى مەن «قىتاي تەمىر جولدارى» اراسىنداعى ارىپتەستىكتى دامىتۋ تۋرالى كەلىسىم جاسالدى

استانا. قازاقپارات - «قازاقستان تەمىر جولى» ۇ ك» ا ق پەن «قىتاي تەمىر جولدارى» اراسىنداعى ارىپتەستىكتى دامىتۋ تۋرالى كەلىسىمگە قول قويىلدى. قۇجات بۇگىن ەلوردادا وتكەن قازاقستان- قىتاي ىسكەرلىك كەڭەسىندە راسىمدەلدى.

كەلىسىمنىڭ ماقساتى - قازاقستان مەن قىتاي تەمىر جولدارى اكىمشىلىكتەرى اراسىنداعى ارىپتەستىكتى نىعايتىپ، دامىتۋ.

 كەلىسىم قازاقستان مەن قىتاي اراسىنداعى، سونداي- اق، قىتاي- قازاقستان- ەۋروپا، قىتاي- قازاقستان- ورتالىق ازيا ەلدەرى ارقىلى وتەتىن تەمىرجول دالىزدەرىمەن جانە وسى جولمەن كەرى بايلانىس باعىتتارى بويىنشا جۇك تاسىمالىن دامىتۋدى كوزدەيدى. ودان بولەك، دوستىق- الاشانكوۋ جانە التىنكول- قورعاس شەكارا ماڭى تەمىرجول وتكەلدەرىن دامىتۋ، ولارعا جەتەلەيتىن تەمىرجول ينفراقۇرىلىمى مەن ەلەكتروندى مالىمەت الماسۋدى ۇلعايتىپ، كونتەينەردەگى جۇك تاسىمالدارى تەحنولوگيالارىن جەتىلدىرۋ ماسەلەلەرى قامتىلعان. ق ر مەن ق ح ر اراسىنداعى كونتەينەرلىك پوەزداردىڭ ساپاسىن ارتتىرۋ جانە ق ر مەن ق ح ر- دىڭ لوگيستيكالىق كومپانيالارى اراسىنداعى بايلانىستى نىعايتىپ، قوس تاراپتاعى قىزمەتكەرلەردىڭ جاعدايىن جاقسارتىپ، جۇمىس ساپاسىن ارتتىرۋ كوزدەلىپ وتىر.

قۇجاتقا «قازاقستان تەمىر جولى» ۇ ك» ا ق پرەزيدەنتى اسقار مامين مەن «قىتاي تەمىر جولدارى» كورپوراتسياسىنىڭ باس ديرەكتورى شەن گۋانتسزۋ قول قويدى.

 

اۆتور: مارلان جيەمباي