ن. نازاربايەۆ پەن د. مەدۆەدەۆ ينتەگراتسيالىق قۇرىلىمدار اياسىنداعى ىقپالداستىق ماسەلەلەرىن تالقىلادى

استانا. قازاقپارات - مەملەكەت باسشىسى نۇرسۇلتان نازاربايەۆ رەسەي فەدەراتسياسىنىڭ ۇكىمەت ءتوراعاسى دميتري مەدۆەدەۆتى قابىلدادى.

بۇل تۋرالى اقوردانىڭ باسپا ءسوز قىزمەتىنەن حابارلادى.

كەزدەسۋ بارىسىندا ساۋدا-ەكونوميكالىق، ەنەرگەتيكالىق جانە كولىك-ترانزيتتىك سالالارداعى ەكىجاقتى ىنتىماقتاستىقتىڭ باسىم باعىتتارى قارالىپ، ينتەگراتسيالىق قۇرىلىمدار اياسىنداعى ىقپالداستىق ماسەلەلەرى تالقىلاندى.

نۇرسۇلتان نازاربايەۆ پەن دميتري مەدۆەدەۆ وڭىرلىك جانە حالىقارالىق كۇن تارتىبىندەگى وزەكتى جايتتار تۋرالى دا ءسوز قوزعادى.

قازاقستان پرەزيدەنتى ءبىزدىڭ ەل مەن رەسەيدىڭ اراسىنداعى ىنتىماقتاستىق تولىق سەنىم نەگىزىندە دامىپ جاتقانىن ايتتى.

«1 - قاڭتاردان باستاپ ءبىزدىڭ مەملەكەتتەرىمىز ەۋرازيالىق ەكونوميكالىق وداق اياسىندا ىقپالداساتىن بولادى. قازىرگى كەزدە ساۋدانىڭ تومەندەگەنى ايتىلۋدا، ءبىراق ول اقشالاي مانگە قاتىستى بايقالىپ وتىر، ال ىنتىماقتاستىقتىڭ ناقتى كولەمى ءوسىپ، بىرلەسكەن كاسىپورىندار دامىپ كەلەدى. باعا كونيۋنكتۋراسى جاقسارعان كەزدە كورسەتكىشتەر دە جاقسى جاعىنا قاراي وزگەرەتىن بولادى. ورتاق كەدەندىك شەكارا، ادامدار مەن جۇكتەردىڭ ەركىن قوزعالىسى ەلدەرىمىز ءۇشىن زور يگىلىك بولىپ سانالادى»، - دەدى مەملەكەت باسشىسى.

نۇرسۇلتان نازاربايەۆ د. مەدۆەدەۆتىڭ وسى ساپارى قازاقستان مەن رەسەيدىڭ ىنتىماقتاستىعىن ودان ءارى دامىتۋعا سەپتىگىن تيگىزەتىندىگىنە سەنىم ءبىلدىردى.

رەسەي ۇكىمەت ءتوراعاسى ەكى ەلدىڭ اراسىنداعى ىنتىماقتاستىقتىڭ دەڭگەيى ءوسىپ كەلە جاتقانىنا توقتالدى.

«ءبىز شىنىمەن دە وتە جاقىن سەرىكتەستەرمىز. ءبىزدىڭ الدىمىزدا باستاۋىندا ءسىز تۇرعان وتە ساليقالى ينتەگراتسيالىق جوبا بار. ەۋرازيالىق ەكونوميكالىق وداقتىڭ كەلەسى جىلدان باستاپ جۇمىس ىستەيتىنى وتە ماڭىزدى. وسى ءساتتى پايدالانا وتىرىپ، ءسىزدى جانە دوستاس قازاقستان حالقىن كەلە جاتقان تاۋەلسىزدىك مەرەكەسىمەن قۇتتىقتاۋعا رۇقسات ەتىڭىز»، - دەدى د. مەدۆەدەۆ.