ق ح ر ءتوراعاسىنىڭ ۇلى جىبەك جولىن جاڭعىرتۋ تۋرالى باستاماسىن قولدايمىز - ن. نازاربايەۆ
بۇل تۋرالى اقوردانىڭ باسپا ءسوز قىزمەتىنەن حابارلادى.
كەزدەسۋ بارىسىندا ەكى ەلدىڭ ساۋدا-ەكونوميكالىق، ينۆەستيسيالىق، وتىن-ەنەرگەتيكالىق جانە كولىك-ترانزيتتىك سالالارداعى ىنتىماقتاستىعىنىڭ نەگىزگى ماسەلەلەرى تالقىلاندى. سونداي-اق حالىقارالىق كۇن تارتىبىندەگى وزەكتى جايتتار جونىندە پىكىر الماسىلدى.
قازاقستان پرەزيدەنتى قىتايمەن اراداعى قارىم-قاتىناستاردىڭ قارقىنى مەن دوستىق سيپاتىنا توقتالدى.
«ءبىز ق ح ر ءتوراعاسى شي جينپيڭمەن بىرنەشە رەت كەزدەستىك، ەلدەرىمىزدىڭ ءارى قارايعى ىقپالداستىعىنا قاتىستى كوپتەگەن ماسەلەلەردى تالقىلادىق. بۇل بايلانىستار ناقتى ەكونوميكالىق سيپات الىپ وتىردى، ولاردىڭ ەڭ ءىرىسى ەنەرگەتيكالىق سەرىكتەستىكتە كورىنىس تاپتى. بۇگىندە قازاقستان مۇنايىنىڭ ەداۋىر بولىگى قىتايلىق كومپانيالاردىڭ قاتىسۋىمەن وندىرىلەدى. ءبىز قازاقستان ارقىلى ەكسپورتتىق قۇبىر جەلىسىن سالدىق»، - دەدى مەملەكەت باسشىسى.
سونىمەن قاتار، نۇرسۇلتان نازاربايەۆ ەكى ەلدىڭ كولىك-ترانزيتتىك سالادا تابىستى ىنتىماقتاسىپ وتىرعانىنا نازار اۋداردى.
«قورعاس» مەملەكەتارالىق ساۋدا ورتالىعىنىڭ قۇرىلىسىن، سونداي-اق ءبىزدىڭ ەلىمىز ارقىلى ترانزيتتى قامتاماسىز ەتۋ ءۇشىن تەمىرجول جانە اۆتوكولىك جولدارىن سالۋ جونىندە بىرلەسكەن جۇمىستار اتقارىلۋدا. بۇل ورايدا ءبىز ق ح ر ءتوراعاسىنىڭ ۇلى جىبەك جولىن جاڭعىرتۋ، ينفراقۇرىلىمدىق جوبالار ءۇشىن ءتيىستى قور جانە بانك قۇرۋ تۋرالى باستاماسىن قولدايمىز»، - دەپ اتاپ ءوتتى مەملەكەت باسشىسى.
لي كىشياڭ ءوز كەزەگىندە مەملەكەت باسشىسىنا ق ح ر ءتوراعاسى شي جينپيڭنىڭ سالەمى مەن يگى تىلەكتەرىن جەتكىزدى، سونداي-اق ەكى ەلدىڭ ءوزارا ىقپالداستىعى وڭ سيپاتتا دامىپ كەلە جاتقانىنا توقتالدى.
«قىتاي حالقى مەن ۇكىمەتى اتىنان ءسىزدى الداعى كەلە جاتقان مەرەكەمەن - قازاقستاننىڭ تاۋەلسىزدىگى كۇنىمەن شىن جۇرەكتەن قۇتتىقتاعىم كەلەدى. ءبىزدىڭ ەلدەرىمىزدىڭ اراسىنداعى ىنتىماقتاستىق وتە جوعارى دەڭگەيدە. مەن قازاقستاندىق ارىپتەستەرىمىزبەن قارىم-قاتىناستارىمىزدى بۇدان ءارى نىعايتۋ جونىندە پىكىر الماسۋعا ءازىرمىن» ، - دەدى لي كىشياڭ.
