قازاقستان مەن قىتاي مۇناي باعاسىنىڭ وزگەرۋىنە بايلانىستى ماكروەكونوميكالىق ساياساتتى ءوزارا كەلىسىپ جۇرگىزەدى

استانا. قازاقپارات - قازاقستان مەن ق ح ر ەنەرگيا تاسىمالداۋشىلارعا، شيكىزاتقا باعانىڭ وزگەرۋى تۇرعىسىندا كەلىسىلگەن ماكروەكونوميكالىق ساياساتتى جۇرگىزۋگە كەلىستى.

 بۇل تۋرالى بۇگىن استانادا ق ح ر مەملەكەتتىك كەڭەسىنىڭ پرەمەرى لي كىشياڭنىڭ قاتىسۋىمەن وتكەن كەلىسسوزدەردەن كەيىن ق ر پرەمەر- ءمينيسترى كارىم ءماسىموۆ ءمالىم ەتتى.

 «بۇگىنگى شاعىن جانە كەڭەيتىلگەن قۇرامداعى كەلىسسوزدەردىڭ اياسىندا ءبىز شىن مانىندە ەكى ەلدىڭ اراسىنداعى ساۋدا- ەكونوميكالىق قاتىناستاردىڭ بارلىق قىرىن تالقىلاۋدان وتكىزدىك. قازاقستان رەسپۋبليكاسى جىبەك جولىنىڭ ەكونوميكالىق بەلدەۋى باعدارلاماسىن قولدايدى. ونى 2013 - جىلى قازاقستانعا ساپارى كەزىندە ق ح ر ءتوراعاسى شي جيپين جاريالاعان بولاتىن. بۇدان ءبىر اي بۇرىن قازاقستان پرەزيدەنتى نۇرسۇلتان ءابىش ۇلى نازاربايەۆ حالىققا ءوز جولداۋىندا «نۇرلى جول» جاڭا ەكونوميكالىق ساياساتتىن جاريالادى. اتاپ ايتقاندا، جىبەك جولى جانە «نۇرلى جول» باعدارلامالارى ءبىرىن- ءبىرى ءوزارا تولىقتىرىپ، ەكى ەل اراسىنداعى ىنتىماقتاستىقتى تەرەڭدەتە تۇسۋگە مۇمكىندىك بەرەدى» ، - دەدى ك. ءماسىموۆ.

 بۇدان بۇرىن حابارلانعانداي، بۇگىن استانادا ق ر ۇلتتىق ەكونوميكا مينيسترلىگى مەن ق ح ر دامۋ جانە رەفورمالار جونىندەگى مەملەكەتتىك كوميتەتى اراسىنداعى «جىبەك جولىنىڭ ەكونوميكالىق بەلدەۋىن» بىرلەسىپ قۇرۋدى ىلگەرىلەتۋ تۋرالى حاتتاماعا قول قويىلدى.

ق ر ۇكىمەت باسشىسى بۇگىن ماڭىزدى ءبىرقاتار ۇكىمەتارالىق جانە مەملەكەتارالىق قۇجاتتارعا قول قويىلعاندىعىن، سونىمەن قاتار ءبىرقاتار وتە ماڭىزدى كەلىسىمشارتتار بەكىتىلەتىندىگىن، بۇل ءوز كەزەگىندە ەكى ەل اراسىنداعى ىنتىماقتاستىقتى نىعايتا تۇسەتىندىگىن اتاپ ءوتتى.

«ءبىز بۇگىن الەمدەگى وزگەرىسكە ۇشىراعان ەكونوميكالىق جاعدايلاردا ، ەنەرگيا تاسىمالداۋشىلارعا، شيكىزاتقا باعانىڭ وزگەرۋى تۇرعىسىندا كەلىسىلگەن ماكروەكونوميكالىق ساياساتتى جۇرگىزەتىنىمىزگە كەلىستىك جانە ءتيىستى ۆەدومستۆولار اراسىندا كونسۋلتاتسيالار جۇرگىزەمىز» ، - دەدى ك. ءماسىموۆ.

 

 اۆتور: رۋسلان عابباسوۆ