قازاق انشىلەرى تاۋەلسىزدىك كۇنىن تويلاۋدى وزبەكستان حالقىنان ۇيرەنۋدى ۇسىنادى
«جاڭا جىلدان بۇرىن تاۋەلسىزدىك مەرەكەسى تويلانۋ قاجەت. ءبىز تاۋەلسىزدىك كۇنى حالىققا جۇمىس ىستەيمىز. بۇل كۇنى بارشا قازاق جۇرتى رەسپۋبليكا الاڭىنا جينالىپ، گۇل شوقتارىن قويۋعا ءتيىس. ال جاڭا جىل كەڭەس ۇكىمەتىنەن كەلە جاتقان دۇنيە بولعاندىقتان، ۇيدە وتىرىپ جالعىز قارسى الساق تا بولادى.
قازىر كوڭىلىمە قاياۋ تۇسىرەتىن جايت - تاۋەلسىزدىكتەن بۇرىن كوشە بويىندا جاڭا جىلدىق جارنامالاردىڭ كوبەيۋى. قاراپ وتىرساڭىز، وزبەكستان حالقى تاۋەلسىزدىك مەرەكەسىن ءبىر اي بويى تويلايدى. سول سەكىلدى قازاقستاندا دا ءبىر اي تويلاسا دەگەن نيەت بار»، - دەدى ق ر-نىڭ ەڭبەك سىڭىرگەن قايراتكەرى، ءانشى نۇرلان ەسپانوۆ.
قازاق ەلىنىڭ ەرلىگىن انگە قوسقان حالىق ءارتىسىنىڭ ايتۋىنشا، ءاربىر قازاق ازاماتىنىڭ وتانىنا، تۋعان جەرىنە، ەلىنە دەگەن پاتريوتتى سەزىمى بولۋى كەرەك.
«مەن تاۋەلسىزدىك قارساڭىندا 5 كۇن بويى استانا، اقتوبە، اتىراۋ قالالارىندا ءوزىمنىڭ جەكە كونسەرتتەرىمدى بەرەمىن. ارنايى دايىندالعان جاڭا اندەرىمدى حالىققا ۇسىنامىن. تاۋەلسىزدىك مەرەكەسىن مەن وتە جوعارعى دەڭگەيدە اتاپ وتەمىن. بۇل مەرەكە قازاقستان رەسپۋبليكاسىنىڭ ايتۋلى داتاسى. ەلىم دەگەن ءاربىر قازاقستاندىق بۇل كۇندى ەلەپ، ەسكەرۋ كەرەك. جاڭا جىلدىق جارنامالاردى ەمەس، تاۋەلسىزدىك تۋرالى افوريزمدەردى ىلسە ءجون بولار ەدى»، - دەدى ق ر حالىق ءارتىسى روزا رىمبايەۆا.
ەستەرىڭىزگە سالا كەتسەك، ءدال وسىدان 28 جىل بۇرىن جەلتوقساندا شىندىق جىرىن ىزدەيمىن دەپ شارق ۇرىپ، ەگەمەندى ەل بولساق دەپ تالپىنعان 99 ادام تەمىر تورعا توعىتىلدى.
ال 264 ستۋدەنت وقۋدان شىعارىلدى، قانشاما بوزداقتار قىرشىننان قيىلدى.
"وسى قازاق جاستارىنىڭ ەرەڭ ەڭبەگىنىڭ ارقاسىندا كەلگەن تاۋەلسىزدىك جاڭا جىلدان كورى، جوعارعى دەڭگەيدە تويلانسا"، - دەيدى ءانشى.
نازىم قىدىرباي قىزى
