سوتقا جۇگىنىپ، سوعىس كەزىندە ەڭبەك ەتكەندىگىن دالەلدەدى - ب ق و

ورال. قازاقپارات - تاسقالا اۋدانىنىڭ تۇرعىنى ك. سەيتقازيەۆ ءوزىنىڭ سوعىس كەزىندە ەڭبەك ەتكەندىگىن سوتقا جۇگىنۋ ارقىلى عانا دالەلدەي الدى.

وبلىستىق سوتتىڭ باسپا ءسوز قىزمەتىنەن تۇسكەن مالىمەتكە قاراعاندا، ول ءوزىنىڭ ارىزىندا كامەن (قازىرگى تاسقالا) اۋدانىنىڭ لەنين اتىنداعى كولحوزىندا 1944 - جىلعى 1 - ساۋىردەن 1 - قازانعا دەيىن جانە 1945 - جىلى 1 - ساۋىردەن 9 - مامىرعا دەيىن جۇمىس جاساعاندىعىن كورسەتكەن.

وسى ارالىقتا ول قوي باعىپ، باۋ-باقشادا ءشوپ جۇلىپ، كوكونىسكە سۋ قۇيىپ، ەگىن جيناۋمەن اينالىسقان. مۇنى راستايتىن قۇجاتتار جوق بولعانىمەن، سول جىلدارى كولحوزدا بريگاديرلىك ەتكەن ف. سالنيكوۆ بار ەكەن. ول ك. سەيتقاليەۆتىڭ ەڭبەك ەتكەندىگىن راستاپ بەردى.

ءسويتىپ تاسقالا اۋداندىق سوتىنىڭ شەشىمىمەن ك. سەيتقازيەۆتىڭ ارىزى قاناعاتتاندىرىلىپ، ونىڭ سوعىس كەزىندە جۇمىس جاساعاندىعى انىقتالدى. بۇل ك. سەيتقازيەۆتىڭ تىل ەڭبەككەرى اتانۋىنا مۇمكىندىك بەرەدى.

اۆتور: ەلجان ەرالى