الماتىدا تاياۋ بولاشاقتا جوعارى ۆولتتى ەلەكتر جەلىلەرى جەر استىمەن جۇرگىزىلەتىن بولادى

الماتى. قازاقپارات - الماتىدا جاقىن بولاشاقتا جوعارى ۆولتتى ەلەكتر جەلىلەرىنىڭ بارلىعى جەر استىمەن جۇرگىزىلەتىن بولادى. بۇل تۋرالى الماتىدا ب ا ق وكىلدەرى ءۇشىن قالاداعى ەنەرگيا كەشەندەرى بويىنشا جاسالعان كوشپەلى جيىن بارىسىندا «سامۇرىق- ەنەرگو» ا ق باسقارماسىنىڭ مۇشەسى، «تاراتۋ جانە وتكىزۋ» ديۆيزيونىنىڭ ديرەكتورى عاني ءسالىمجۋاروۆ مالىمدەدى.

«ەنەرگەتيكا سالاسىندا «تەرەڭ ەنگىزۋ» دەگەن تۇسىنىك بار. ياعني، ەلەكتر جەلىلەرىن جەر استى كابەلدەرى ارقىلى جۇرگىزۋ. وسى ماقساتتا الماتى قالاسىندا ارنايى باعدارلاما قابىلدانعان. سونىڭ اياسىندا بولاشاقتا قالادا وتكىزگىشتىگى 110 ك ۆ جوعارى بارلىق ەلەكتر جەلىلەرى جەر استىمەن، كابەلدەر ارقىلى جۇرگىزىلەتىن بولادى. بۇل بىرىنشىدەن قاۋىپسىز. ەكىنشىدەن وتە سەنىمدى. قىستا قار جاۋعاندا، اعاشتار قۇلاعاندا ءۇزىلىپ كەتەدى دەپ قورىقپايسىڭ. دەگەنمەن، بۇل ءۇشىن الدىمەن قازىرگى تاڭدا جەر استىمەن جۇرگىزىلگەن ەسكى كابەلدەردىڭ ءوزىن جاڭارتىپ الۋىمىز كەرەك» - دەدى ءوز سوزىندە ع. ءسالىمجۋاروۆ.

سونىمەن قاتار، عاني عاليوللا ۇلىنىڭ ايتۋىنشا، ازىرشە قالادا ەسكى، جالاڭاش ەلەكتر جەلىلەرى مىقتى توق ايىراتىن قابى، ياعني وقشاۋلاعىشى بار جەلىلەرگە اۋىستىرىلىپ جاتىر.

«بيىل الماتى قالاسىندا 200 شاقىرىم ەلەكتر سىمدارى جاڭارتىلدى. ال كۇنى بۇگىنگە دەيىن جالپى ۇزىندىعى 900 شاقىرىمعا جۋىقتايتىن ەلەكتر سىمدارى زاماناۋي، سەنىمدى ەلەكتر جەلىلەرىنە اۋىستىرىلىپ قويىلدى. ولار قارعا، اعاش بۇتاقتارىنىڭ قۇلاۋىنا جانە باسقا دا قىسىمدارعا ءتوزىمدى كەلەدى» - دەدى ع. ءسالىمجۋاروۆ.  

اۆتور:   جاپپاربەرگەن ايبوتا